ഗൂഡല്ലൂര്‍: മദ്യശാലക്കെതിരേ സമരം ചെയ്തവരെ പൊലിസ് അറസ്റ്റ് ചെയ്തു. കുന്നൂര്‍-ജഗദളയിലെ മദ്യശാലക്ക് മുന്നില്‍ സമരം നടത്തിയവരെയാണ് പൊലിസ് അറസ്റ്റ് ചെയ്തു നീക്കിയത്. തമിഴ് മാനില കോണ്‍ഗ്രസ് യുവജന വിഭാഗം സംസ്ഥാന സെക്രട്ടറി യുവരാജിന്റെ നേതൃത്വത്തിലായിരുന്നു സമരം.
കുന്നൂരിനടുത്ത അരുവങ്കാട് ദേശീയപാതയില്‍ പ്രവര്‍ത്തിച്ചിരുന്ന മദ്യശാലയാണ് സുപ്രിംകോടതി വിധിയെ തുടര്‍ന്ന് അധികൃതര്‍ ജഗദളയിലേക്ക് മാറ്റിയത്. ജനങ്ങള്‍ തിങ്ങിപ്പാര്‍ക്കുന്ന പ്രദേശത്ത് ക്ഷേത്രത്തിന് സമീപമാണ് നിലവില്‍ മദ്യശാല പ്രവര്‍ത്തിക്കുന്നത്.
വ്യാപക പ്രതിഷേധമുയര്‍ന്നിട്ടും മദ്യശാല മാറ്റാന്‍ നടപടികളില്ലാതായതോടെയാണ് സമരവുമായി പ്രദേശവാസികള്‍ രംഗത്തെത്തിയത്. മുന്‍ എം.എല്‍.എ ഗോപാല്‍ അടക്കമുള്ള 30 പേരെയാണ് അറസ്റ്റ് ചെയ്തയ്.