മുക്കം: കോളജ് വിദ്യാര്‍ഥികള്‍ തമ്മിലുണ്ടായ സംഘര്‍ഷത്തില്‍ നിരവധി പേര്‍ക്ക് പരുക്ക്.
മണാശ്ശേരി എം.എ.എം.ഒ കോളജിലെയും കളന്‍തോട് എം.ഇ.എസ് കോളജിലെയും വിദ്യാര്‍ഥികളാണ് പരസ്പരം ഏറ്റുമുട്ടിയത്. ഗുരുതരമായി പരുക്കേറ്റ രണ്ടു വിദ്യാര്‍ഥികളെ മണാശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചയ്ക്ക് ഒരു മണിയോടെ എം.എ.എം.ഒ കോളജിന്റെ കവാടത്തിന് മുന്നിലാണ് സംഭവം നടന്നത്. എം.ഇ.എസ് കോളജിലെ ആര്‍ട്‌സ് ഡേയ്ക്കിടെ രണ്ടു വിദ്യാര്‍ഥികള്‍ എം.എ.എം.ഒ കോളജിലെത്തി ഇവിടെയുള്ള വിദ്യാര്‍ഥികളുമായി വാക്കേറ്റവും കൈയാങ്കളിയും ഉണ്ടാക്കിയതാണ് സംഘര്‍ഷത്തിന് കാരണമായതെന്ന് പൊലിസ് പറഞ്ഞു.
ഇതേ തുടര്‍ന്ന് എം.ഇ.എസ് കോളജിലെ കൂടുതല്‍ വിദ്യാര്‍ഥികള്‍ എത്തിയതോടെ ഇരു കോളജുകളിലെയും വിദ്യാര്‍ഥികള്‍ എം.എ.എം.ഒ കോളജിന് മുന്നിലെ മണാശ്ശേരി കൂളിമാട് റോഡില്‍ വച്ച് ഏറ്റുമുട്ടുകയായിരുന്നു. തടയാന്‍ ശ്രമിച്ച നാട്ടുകാരെയും വിദ്യാര്‍ഥികള്‍ കൈയേറ്റം ചെയ്തു. സംഘര്‍ഷത്തെ തുടര്‍ന്ന് മണാശ്ശേരി മാവൂര്‍ പാതയില്‍ ഒരു മണിക്കൂറോളം ഗതാഗതം തടസപ്പെട്ടു.
വിദ്യാര്‍ഥികള്‍ തമ്മിലുണ്ടായ ശക്തമായ കല്ലേറില്‍ രണ്ടു കാറിനും നിരവധി ബൈക്കുകള്‍ക്കും കേടുപാട് പറ്റി. ഇരുപതോളം ബൈക്കുകളുടെ ടയറിലെ കാറ്റ് വിദ്യാര്‍ഥികള്‍ ഒഴിച്ച് വിട്ടു. വിവരമറിഞ്ഞെത്തിയ മുക്കം എസ്.ഐ കെ.പി അഭിലാഷിന്റെ നേതൃത്വത്തിലുള്ള പൊലിസ് ലാത്തിവീശി വിദ്യാര്‍ഥികളെ വിരട്ടിയോടിച്ചതോടെയാണ് സംഘര്‍ഷാവസ്ഥയ്ക്ക് അയവ് വന്നത്. സംഘര്‍ഷത്തെ തുടര്‍ന്ന് പൊലിസ് കസ്റ്റഡിയിലെടുത്ത കാറിനുള്ളിലെ പുസ്തകത്തില്‍നിന്നു കഞ്ചാവ് കണ്ടെത്തിയിട്ടുണ്ട്.
വിദ്യാര്‍ഥികളില്‍ പലരും ലഹരി വസ്തുക്കള്‍ ഉപയോഗിച്ചിരുന്നതായി നാട്ടുകാര്‍ പറഞ്ഞു. അന്‍പതോളം ബൈക്കുകളും നാലു കാറും പൊലിസ് കസ്റ്റഡിയിലെടുത്തിട്ടുണ്ട്. എം.ഇ.എസ് കോളജിലെ 20 വിദ്യാര്‍ഥികള്‍ക്കെതിരേ മുക്കം പൊലിസ് കേസെടുത്തു.