ദുബൈ: വെസ്റ്റ് ഇന്‍ഡീസ് പര്യടനത്തിലെ മോശം പ്രകടനത്തിനു പിന്നാലെ ഇന്ത്യന്‍ നായകന്‍ വിരാട് കോഹ്‌ലിക്ക് റാങ്കിങില്‍ തിരിച്ചടി. രണ്ടാം സ്ഥാനത്തേക്ക് പിന്തള്ളപ്പെട്ടപ്പോള്‍ ഓസീസ് താരം സ്റ്റീവ് സ്മിത്ത് ഒന്നാം സ്ഥാനത്ത് തിരിച്ചെത്തി. അതേസമയം, ടെസ്റ്റിലേക്ക് കുറച്ചുനാള്‍ മുന്‍പ് കാലെടുത്തുവച്ച ബുംറ കരിയറിലെ മികച്ച നേട്ടമായ മൂന്നാം സ്ഥാനത്തെത്തി.
ഒരു പോയിന്റ് വ്യത്യാസത്തിലാണ് കോഹ്‌ലിയെ (903) പിന്തള്ളി സ്മിത്ത്(904) ഒന്നാം സ്ഥാനത്തെത്തിയത്. ജമൈക്കന്‍ ടെസ്റ്റിലെ ഡക്ക് ഔട്ടാണ് കോഹ്‌ലിക്ക് വിനയായതെങ്കില്‍ ഇംഗ്ലണ്ടിനെതിരായ ആദ്യ ടെസ്റ്റിലെ രണ്ട് സെഞ്ചുറികളാണ് സ്മിത്തിന് നേട്ടമായത്. വിന്‍ഡീസിനെതിരേയുള്ള പ്രകടനം രഹാനെയ്ക്ക് നേട്ടമുണ്ടാക്കി. നാല് സ്ഥാനങ്ങള്‍ മെച്ചപ്പെടുത്തി താരം ഏഴാം സ്ഥാനത്തെത്തി. കൂടാതെ, ആദ്യ സെഞ്ചുറി കുറിച്ച വിഹാരി 40 സ്ഥാനങ്ങള്‍ മെച്ചപ്പെടുത്തി 30ലെത്തി. വെറും ആറ് ടെസ്റ്റ് മത്സരങ്ങളില്‍ നിന്നാണ് മികച്ച നേട്ടം.
കരീബിയന്‍ മണ്ണില്‍ രണ്ട് ടെസ്റ്റുകളില്‍നിന്നായി 13 വിക്കറ്റുകള്‍ വീഴ്ത്തിയതാണ് ബുംറയെ ബൗളര്‍മാരില്‍ മൂന്നാം സ്ഥാനത്തെത്താന്‍ സഹായിച്ചത്. കരിയറിലെ മികച്ച പോയിന്റോടെയാണ് (835) താരത്തിന്റെ സ്ഥാനക്കയറ്റം. ആസ്‌ത്രേലിയയുടെ പാറ്റ് കമ്മിന്‍സും ദക്ഷിണാഫ്രിക്കയുടെ കഗീസോ റബാദയുമാണ് ആദ്യ രണ്ട് സ്ഥാനങ്ങളില്‍.