കൊയിലാണ്ടി: രാത്രികാലങ്ങളില്‍ വാഹനങ്ങളുടെ ടയറുകള്‍ മോഷണം നടത്തുന്ന പ്രതി പൊലിസ് പിടിയില്‍. കൊയിലാണ്ടി കൊടക്കാട്ട്മുറി പുതിയോട്ടില്‍ പ്രസാദിനെയാണ് കൊയിലാണ്ടി പൊലിസ് അറസ്റ്റ് ചെയ്തത്. കഴിഞ്ഞ ദിവസം പുലര്‍ച്ചെ മുചുകുന്ന് മഞ്ചാടിക്കുനി സജിത്ത് എന്നയാളുടെ വീട്ടുമുറ്റത്ത് നിര്‍ത്തിയിട്ടിരുന്ന ലോറിയുടെ ടയറും ഡിസ്‌ക്കും മോഷണം നടത്തിയ കേസിലാണ് പ്രതിയെ അറസ്റ്റ് ചെയ്തത്. മോഷ്ടിച്ച ടയറും ഡിസ്‌ക്കും പ്രതി സ്വന്തം ലോറിയില്‍ ഫിറ്റ് ചെയ്ത് ഉപയോഗിക്കുന്നതായി പൊലിസ് കണ്ടെത്തി. മുന്‍കൂട്ടി കിട്ടിയ വിവരമനുസരിച്ച് പ്രതിയുടെ ലോറി പൊലിസ് ആദ്യം തന്നെ കസ്റ്റഡിയിലെടുത്തിരുന്നു. ലോറി പൊലിസ് കസ്റ്റഡിയിലെടുത്തതിനെതുടര്‍ന്ന് പ്രതി ഒളിവില്‍ പോവുകയും മംഗലാപുരം ഭാഗത്ത് മീന്‍ലോറികളില്‍ ജോലി ചെയ്തുവരികയുമായിരുന്നു.
സമീപ കാലങ്ങളില്‍ കൊയിലാണ്ടിയിലും പരിസര പ്രദേശങ്ങളിലും വാഹനങ്ങളില്‍നിന്നും ഇത്തരം വസ്തുക്കള്‍ മോഷണം പോയതുമായി ബന്ധപ്പെട്ട് പിടിയിലായ പ്രതിയെ കേന്ദ്രീകരിച്ച് കൂടുതല്‍ അന്വേഷണം നടക്കുമെന്ന് സി.ഐ ഉണ്ണികൃഷ്ണന്‍ പറഞ്ഞു. അന്വേഷണ സംഘത്തില്‍ സീനിയര്‍ പൊലിസ് ഓഫിസര്‍മാരായ കുഞ്ഞമ്മദ് ആവള, മനോജ്, സുനില്‍കുമാര്‍ എന്നിവരാണുള്ളത്.