ന്യൂഡല്‍ഹി: ഭീമാ- കൊറിഗാവ് സംഘര്‍ഷവുമായി ബന്ധപ്പെട്ട് മനുഷ്യാവകാശ പ്രവര്‍ത്തകരായ വെര്‍ണന്‍ ഗോണ്‍സാല്‍വസ്, അരുണ്‍ ഫെരേറ എന്നിവരെ എന്നിവരെ മഹാരാഷ്ട്ര പൊലിസ് അറസ്റ്റ്‌ചെയ്തു. ഇരുവരുടെയും ജാമ്യാപേക്ഷ തള്ളിയതിനു പിന്നാലെയാണ് അറസ്റ്റ് നടപടി.

കേസില്‍ നേരത്തെ അറസ്റ്റിലാവുകയും പിന്നീട് വീട്ടുതടങ്കലിലേക്കു മാറ്റപ്പെടുകയും ചെയ്ത ഗോണ്‍സാല്‍വസ്, ഫെരേറ, സുധാഭരദ്വാജ് എന്നിവരുടെ ജാമ്യാപേക്ഷ പൂനെ പ്രത്യേക കോടതിയാണ് വെള്ളിയാഴ്ച തള്ളിയത്. ഭീമാകൊറിഗാവ് സംഘര്‍ഷത്തെത്തുടര്‍ന്ന് മാവോയിസ്റ്റ് ബന്ധം ആരോപിച്ച് യു.എ.പി.എ നിയമപ്രകാരം ആഗസ്ത് 28ന് അറസ്റ്റ്‌ചെയ്യപ്പെട്ട വിപ്ലവ കവി വരവര റാവു, സുധാ ഭരദ്വാജ്, ഗൗതം നവ്‌ലാഖ, വെര്‍ണന്‍ ഗോണ്‍സാല്‍വസ്, അരുണ്‍ ഫെരേറ എന്നിവരെ സുപ്രിംകോടതി ഇടപെട്ട് കഴിഞ്ഞമാസമാണ് വീട്ടുതടങ്കലിലേക്കു മാറ്റിയത്.

വീട്ടുതടങ്കല്‍ കാലാവധി നാലാഴ്ചയായിരുന്നു. ഈ പരിധി അവസാനിക്കുന്ന സാഹചര്യത്തിലാണ് ഇവര്‍ വീണ്ടും ജാമ്യത്തിനായി അപേക്ഷിച്ചത്.

അപേക്ഷ ഉച്ചയോടെ തള്ളുകയും ഇതിനു പിന്നാലെ വൈകീട്ടോടെ രണ്ടുപേരെയും പൊലിസ് അറസ്റ്റ്‌ചെയ്യുകയുമായിരുന്നു. ഫെരേറയെ മുംബൈയിലെയും ഗോണ്‍സാല്‍വസിനെ താനെയിലെയും വസതികളില്‍ നിന്നാണ് അറസ്റ്റ്‌ചെയ്തത്.

ഇരുവരെയും ശനിയാഴ്ച പൂനെ കോടതിയില്‍ ഹാജരാക്കുമെന്ന് മഹാരാഷ്ട്ര പൊലിസ് അറിയിച്ചു. ഇവരുടെ അറസ്റ്റ്‌നടപടികള്‍ ചോദ്യംചെയ്ത് പ്രമുഖ ചരിത്രകാരി റൊമീലാ ഥാപ്പറും സാമ്പത്തിക വിദഗ്ധന്‍ പ്രൊഫ. പ്രഭാത് പട്‌നായികും നല്‍കിയ ഹരജി ചീഫ്ജസ്റ്റിസ് ദീപക് മിശ്ര അധ്യക്ഷനായ സുപ്രിംകോടതിയുടെ മൂന്നഗബെഞ്ചിന്റെ പരിഗണനയിലാണ്.