തിരൂരങ്ങാടി: മമ്പുറം ഖുഥ്ബുസ്സമാന്‍ സയ്യിദ് അലവി മൗലദ്ദവീല തങ്ങളുടെ 181ാമത് ആണ്ടുനേര്‍ച്ചക്കു നാളെ കൊടിയിറക്കം. നാളെ ളുഹ്‌റ് നിസ്‌കാരാനന്തരം നടക്കുന്ന മൗലിദ് ഖത്മ് ദുആയോടെയാണ് ഒരാഴ്ചത്തെ ആണ്ടുനേര്‍ച്ചക്ക് സമാപ്തിയാവുക.
നാളെ രാവിലെ എട്ട് മുതല്‍ അന്നദാനം നടക്കും. പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സയ്യിദ് അബ്ദുറഹ്മാന്‍ ജിഫ്‌രി തങ്ങള്‍ കോഴിക്കോട് അധ്യക്ഷനാകും. സയ്യിദ് ആബിദ് ഹുസൈന്‍ തങ്ങള്‍ എം.എല്‍.എ, സയ്യിദ് അഹ്മദ് ജിഫ്‌രി തങ്ങള്‍ മമ്പുറം എന്നിവര്‍ സംബന്ധിക്കും. ഒരു ലക്ഷത്തിലധികം പേര്‍ക്കുള്ള നെയ്‌ച്ചോര്‍ പാക്കുകളാണ് അന്നദാനത്തിനായി ഒരുക്കുന്നത്. ഉച്ചക്ക് രണ്ടിന് നടക്കുന്ന മൗലിദ് ഖത്മ് ദുആക്ക് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ നേതൃത്വം നല്‍കും.
ഇന്ന് പ്രാര്‍ഥനാ സമ്മേളനവും മമ്പുറം സയ്യിദ് അലവി മൗലദ്ദവീല ഹിഫ്‌ളുല്‍ ഖുര്‍ആന്‍ കോളജില്‍നിന്ന് ഖുര്‍ആന്‍ മനഃപാഠമാക്കിയവര്‍ക്കുള്ള സനദ്ദാനവും നടക്കും.
സാദിഖലി ശിഹാബ് തങ്ങള്‍, സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍, വാവാട് കുഞ്ഞിക്കോയ മുസ്‌ലിയാര്‍ ഡോ. ബഹാഉദ്ദീന്‍ മുഹമ്മദ് നദ്‌വി സംബന്ധിക്കും.