കൊല്ലം: 21-ാമത് സംസ്ഥാന സ്‌പെഷല്‍ സ്‌കൂള്‍ കലോത്സവത്തിന് തുടക്കമായി. ആടിയും പാടിയും നൃത്തംവെച്ചും കൊച്ചു കുട്ടുകാര്‍ പരിമിതികളെ മറികടന്ന് അരങ്ങു തകര്‍ത്തപ്പോള്‍ കാണികളെ ആവേശത്തിലാക്കി. ആദ്യ ദിനത്തില്‍ പാലക്കാട് വെസ്റ്റ് യാക്കര ശ്രവണ സംസാര സ്‌കൂള്‍ നാല് എ ഗ്രേഡ് ഉള്‍പ്പെടെ 23 പോയിന്റോടെ മുന്നിലെത്തി. 21 പോയിന്റോടെ കോട്ടയം നീര്‍പറ ഡിഫ് അസീസി മൗണ്ട് സ്‌കൂള്‍ തൊട്ടു പുറകിലുണ്ട്. 17 പോയിന്റോടെ കോഴിക്കോട് റഹ്മാനിയ ഹാന്‍ട്രിക്രാപ്ട് സ്‌കൂളാണ് മൂന്നാമത്.
കലാമേളയില്‍ സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള 1800 ഓളം വിദ്യാര്‍ഥികളാണ് പങ്കെടുക്കുന്നത്. ആദ്യമായാണ് സംസ്ഥാന സ്‌പെഷ്യല്‍ സ്‌കൂള്‍ കലാമേളക്ക് കൊല്ലം ആഥിത്യം വഹിക്കുന്നത്. കര്‍മലറാണി ട്രെയിനിങ് കോളജ് ആണ് മുഖ്യവേദി. കാഴ്ചയ്ക്ക് വെല്ലുവിളിയുള്ളവര്‍, കേള്‍വിക്ക് വെല്ലുവിളിയുള്ളവര്‍, മാനസിക വെല്ലുവിളിയുള്ളവര്‍ എന്നീ വിഭാഗങ്ങളിലായി ഹൈസ്‌കൂള്‍, ഹയര്‍സെക്കന്‍ഡറി വിദ്യാര്‍ഥികള്‍ പ്രത്യേകമാണ് മത്സരങ്ങള്‍ നടക്കുന്നത്. ആദ്യദിവസം മോഹിനിയാട്ടം, നാടോടിനൃത്തം, സംഘനൃത്തം, ഒപ്പന, മോണോആക്ട്, സംഘഗാനം, ചിത്രരചന, പദ്യപാരായണം തുടങ്ങിയ മത്സരങ്ങളാണ് നടന്നത്. പ്രളയദുരിതത്തിന്റെ പശ്ചാത്തലത്തില്‍ ഇത്തവണ ഉദ്ഘാടന സമാപനസമ്മേളനങ്ങളടക്കം കലോത്സവത്തിന്റെ ആഘോഷങ്ങള്‍ പൂര്‍ണമായും ഒഴിവാക്കിയാണ് മേള നടത്തുന്നത്. മേള ഞായറാഴ്ച സമാപിക്കും.