ലണ്ടന്‍: 'ഭീകരരെ' പേടിച്ച് സ്ലൊവേനിയയില്‍ നിന്ന് ലണ്ടനിലേക്കുള്ള ഈസി ജെറ്റ് വിമാനം വഴിതിരിച്ചുവിട്ട് അടിയന്തര ലാന്റിങ് നടത്തി. വിമാനത്തില്‍ സംശയകരമായ സംഭാഷണം നടന്നതായി പൈലറ്റിന്റെ ശ്രദ്ധയില്‍പ്പെട്ടതോടെയാണ് സംഭവം. ബ്രിട്ടീഷ് പൗരനെ സംഭവത്തില്‍ കസ്റ്റഡിയിലെടുത്തിട്ടുണ്ട്. മൂന്നു പേര്‍ തമ്മില്‍ നടത്തിയ സംഭാഷണമാണ് പ്രശ്‌നത്തിലേക്ക് നയിച്ചത്.
ലജുബ്‌ലിജാനയില്‍ നിന്ന് സ്റ്റാന്‍സ്‌ടെഡിലേക്കുള്ള വിമാനമാണ് ജര്‍മനിയിലെ കൊളോഗെന്‍ബോണ്‍ വിമാനത്താവളത്തിലേക്ക് തിരിച്ചുവിട്ടത്. 151 യാത്രക്കാരാണ് വിമാനത്തിലുണ്ടായിരുന്നത്. യാത്രക്കാരെ ഒഴിപ്പിച്ച് വിമാനം പരിശോധന നടത്തിയ ശേഷമാണ് യാത്ര തുടര്‍ന്നത്. ഇതുവരെ മൂന്നു മണിക്കൂര്‍ വിമാനവും യാത്രക്കാരും വിമാനത്താവളത്തില്‍ കുടുങ്ങി.
പൈലറ്റ് അടിയന്തര ലാന്റിങ് നിര്‍ദേശിച്ചതിനെ തുടര്‍ന്നാണ് വിമാനം ഇറങ്ങാനുള്ള സൗകര്യം നല്‍കിയതെന്ന് വിമാനത്താവള അധികൃതര്‍ പറഞ്ഞു. അടിയന്തര ലാന്റിങ്ങിനിടെ സ്ലൈഡ് വഴി വിമാനത്തില്‍ നിന്നിറങ്ങി പരുക്കേറ്റ ഒന്‍പതു പേര്‍ക്ക് ചികിത്സ നല്‍കി.