ജിദ്ദ: സഊദി സര്‍ക്കാറിന് കീഴിലുള്ള പ്രാഥമികാരോഗ്യ കേന്ദ്രങ്ങളില്‍ ഇന്‍ഷുറന്‍സ് കാര്‍ഡുള്ള വിദേശികള്‍ക്ക് ചികിത്സാ സൗകര്യമൊരുങ്ങുന്നു. നിലവില്‍ സര്‍ക്കാര്‍ ആരോഗ്യ കേന്ദ്രങ്ങളില്‍ വിദേശികള്‍ക്ക് ഇന്‍ഷുറന്‍സ് പരിരക്ഷയില്‍ ചികിത്സ നല്‍കുന്നില്ല. അതേസമയം വീട്ടുജോലിക്കാരായ വിദേശികള്‍ക്ക് ചികിത്സാ സൗകര്യം നല്‍കുന്നുമുണ്ട്. ഇനി മുതല്‍ ആരോഗ്യ ഇന്‍ഷുറന്‍സ് പരിരക്ഷയുള്ള എല്ലാ വിദേശികള്‍ക്കും ആരോഗ്യ മന്ത്രാലയത്തിനു കീഴിലെ പ്രാഥമികാരോഗ്യ കേന്ദ്രങ്ങളില്‍ ചികിത്സ നല്‍കുവാനാണ് തീരുമാനം.

ഇതുസംബന്ധിച്ച തീരുമാനം ആരോഗ്യ മന്ത്രാലയം പുറത്തിറക്കി. ഏതൊക്കെ പ്രാഥമികാരോഗ്യ കേന്ദ്രങ്ങളില്‍ എത്ര നിരക്കിളവില്‍ ചികിത്സ നല്‍കാനാവുമെന്നതിനെക്കുറിച്ചു കൗണ്‍സില്‍ ഓഫ് കോഓപ്പറേറ്റീവ് ഹെല്‍ത്ത് ഇന്‍ഷുറന്‍സുമായി ആരോഗ്യ മന്ത്രാലയ അധികൃതര്‍ ചര്‍ച്ച നടത്തിവരികയാണ്. കുറഞ്ഞ ചിലവില്‍ വിദേശികള്‍ക്ക് മികച്ച ചികിത്സ ലഭിക്കാന്‍ പുതിയ തീരുമാനം മുഖേന സാധിക്കും. ആരോഗ്യ ഇന്‍ഷുറന്‍സ് രംഗത്ത് സ്വകാര്യ ആശുപത്രികളില്‍ നടക്കുന്ന അനാരോഗ്യ പ്രവണതകളെ ഒരു പരിധിവരെ തടുക്കുവാനും പുതിയ തീരുമാനം കൊണ്ട് സാധിക്കും.