തിരൂര്‍: അധ്യാപക സമരത്തെ തുടര്‍ന്ന് അധ്യയനം താളം തെറ്റിയ തിരൂര്‍ ഫാത്തിമ മാത സ്‌കൂളിലെ വിദ്യാര്‍ഥികളുടെ രക്ഷിതാക്കള്‍ ഇന്ന് പ്രശ്‌നപരിഹാരത്തിനായി മാനേജ്‌മെന്റ് പ്രതിനിധികളുമായി ചര്‍ച്ച നടത്തും. പ്രശ്‌ന പരിഹാരത്തിന് വേണ്ടി വന്നാല്‍ ബിഷപ്പിനെ കണ്ട് കാര്യങ്ങള്‍ ബോധ്യപ്പെടുത്താനും സമരസമിതി വിളിച്ചുചേര്‍ത്ത രക്ഷിതാക്കളുടെ യോഗത്തില്‍ തീരുമാനമായി. യോഗത്തില്‍ പുതിയ കമ്മിറ്റിയ്ക്കും രൂപം നല്‍കി.
സമരത്തെ തുടര്‍ന്ന് നഷ്ടപ്പെട്ട അധ്യയന ദിനങ്ങള്‍ക്ക് പകരം ഒഴിവു ദിവസങ്ങളില്‍ എസ്.എസ്.എല്‍.സി വിദ്യാര്‍ഥികള്‍ക്കായി സമരരംഗത്തുള്ള അധ്യാപകര്‍ ക്ലാസെടുത്തു നല്‍കുമെന്ന് സമരസമിതി രക്ഷിതാക്കള്‍ക്ക് ഉറപ്പുനല്‍കി. പ്രശ്‌ന പരിഹാരത്തിന്റെ ഭാഗമായി ഇന്നലെ രാവിലെ എസ്.എസ്.എല്‍.സി വിദ്യാര്‍ഥികളുടെ രക്ഷിതാക്കളുമായി മാനേജ്‌മെന്റ് പ്രതിനിധികള്‍ ചര്‍ച്ച നടത്തിയിരുന്നു.
തിങ്കളാഴ്ച ഇതുസംബന്ധിച്ച തീരുമാനം അറിയിക്കാമെന്നാണ്  രക്ഷിതാക്കള്‍ക്ക് മാനേജ്‌മെന്റ് വിവരം നല്‍കിയിരിക്കുന്നത്. കഴിഞ്ഞ എട്ടു ദിവസത്തിലധികമായി ഫാത്തിമ മാത സ്‌കൂളിലെ അധ്യാപകര്‍ സമരരംഗത്തായതിനാല്‍ കുട്ടികളുടെ അധ്യയനം മുടങ്ങിയിരുന്നു. ഇതേ തുടര്‍ന്നാണ് രക്ഷിതാക്കള്‍ എത്രയും വേഗം പ്രശ്‌നം പരിഹരിക്കണമെന്ന് ആവശ്യപ്പെട്ട് രംഗത്തുവന്നത്.
തിരൂര്‍ ജി.എം.യു.പി സ്‌കൂളില്‍ ചേര്‍ന്ന യോഗത്തില്‍ കെ കൃഷ്ണ്‍ നായര്‍ അധ്യക്ഷനായി. സി.പി.എം ഏരിയാ സെക്രട്ടറി അഡ്വ. പി ഹംസക്കുട്ടി, എം ബാപ്പുട്ടി, ടി.പി ലക്ഷ്ണന്‍, കൗണ്‍സിലര്‍ ഒ.എം ഇസ്ഹാഖ്, ടി ദിനേശ്കുമാര്‍ സംസാരിച്ചു.