കൊല്ലം: ട്രെയിന്‍ യാത്രയ്ക്കിടെ ചികിത്സ കിട്ടാതെ മുന്‍ ദേശീയ ജൂനിയര്‍ ഹോക്കി ടീം താരം മരിച്ച സംഭവത്തില്‍ റെയില്‍വേ ഉദ്യോഗസ്ഥര്‍ക്കെതിരേ പരാതിയുമായി കുടുംബം. കൊല്ലം നെടുമ്പന പള്ളിമണ്‍ പുനവൂര്‍ ചരുവിളവീട്ടില്‍ മധു- രോഹിണി ദമ്പതികളുടെ മകന്‍ മനുവാണ് (23) ഹൃദയാഘാതത്തെ തുടര്‍ന്ന് മരിച്ചത്. ട്രെയിന്‍ യാത്രയ്ക്കിടെ നെഞ്ചുവേദന അനുഭവപ്പെട്ട മനുവിന് ചികിത്സാ സൗകര്യം നല്‍കാന്‍ റെയില്‍വേ അധികൃതര്‍ തയാറായില്ലെന്നാണ് ബന്ധുക്കളുടെ ആരോപണം.
കഴിഞ്ഞ ആറിനായിരുന്നു സംഭവം. പുതുച്ചേരി സര്‍വകലാശാലയിലെ ബിരുദാനന്തര ബിരുദ വിദ്യാര്‍ഥിയായ മനു അന്നേ ദിവസം വൈകിട്ട് സുഹൃത്ത് നിധിനുമായാണ് കേരളത്തിലേക്ക് ട്രെയിന്‍ കയറിയത്. യാത്രയ്ക്കിടെ മനുവിന് നെഞ്ചുവേദന അനുഭവപ്പെടുകയും സുഹൃത്ത് നിധിന്‍ ഇക്കാര്യം ടി.ടി.ആറിനെ അറിയിക്കുകയും ചെയ്തു. പുതുച്ചേരിയിലെ വൃന്ദച്ഛല്‍ റെയില്‍വേ സ്റ്റേഷനില്‍ ചികിത്സാ സൗകര്യവും ആംബുലന്‍സും ഒരുക്കാമെന്ന് ടി.ടി.ആര്‍ സുഹൃത്തിനെ അറിയിച്ചെങ്കിലും സ്റ്റേഷനിലെത്തിയപ്പോള്‍ അവിടെ ആംബുലന്‍സോ മറ്റ് സംവിധാനങ്ങളോ ഉണ്ടായിരുന്നില്ല. തുടര്‍ന്ന് അരമണിക്കൂര്‍ നേരം മനുവിന് റെയില്‍വേ സ്‌റ്റേഷനില്‍ കഴിയേണ്ടതായി വന്നു.
പിന്നീട് സ്റ്റേഷനിലിറങ്ങി പ്രദേശവാസിയുടെ സഹായത്തോടെ സുഹൃത്ത് ഏര്‍പ്പാടാക്കിയ ആംബുലന്‍സ് എത്തുമ്പോഴേക്കും മനു മരിച്ചിരുന്നു. നിര്‍ധന കുടുംബത്തിലെ അംഗമായിരുന്ന മനു കായികരംഗത്തു മികവു കാട്ടിയ പ്രതിഭയായിരുന്നു. ദേശീയ ഹോക്കി ടീമില്‍ സെലക്ഷന്‍ ലഭിച്ച മനു നിരവധി മത്സരങ്ങളില്‍ പങ്കെടുക്കുകയും ചെയ്തിരുന്നു. മായ സഹോദരിയാണ്.