തിരുവനന്തപുരം: കേരളാ പൊലിസില്‍ കേസ് രജിസ്റ്റര്‍ ചെയ്ത ശേഷമുള്ള എല്ലാ വിവരങ്ങളും തത്സമയം ഫോണുകളില്‍ ലഭ്യമാക്കാനുള്ള സംവിധാനത്തിന് കേരളാ പൊലിസ് രൂപം നല്‍കി. കേസ് രജിസ്റ്റര്‍ ചെയ്ത് ചാര്‍ജ്ഷീറ്റ് രജിസ്റ്റര്‍ ചെയ്തതുമുതല്‍ വിധിവരുന്നത് വരെയുള്ള വിവരങ്ങള്‍ ലഭ്യമാകും. കേസിന്റെ പുരോഗതി ഡിജിറ്റല്‍ മാര്‍ഗത്തിലൂടെ അറിയണമെന്ന പൊതുജനങ്ങളുടെ ആഗ്രഹം നടപ്പാക്കുകയാണ് ഈ പദ്ധതിമുഖേനയെന്ന് സംസ്ഥാന പൊലിസ് മേധാവി ലോക്‌നാഥ് ബെഹ്‌റ പറഞ്ഞു.

ക്രൈം ആന്‍ഡ് ക്രിമിനല്‍ ട്രാക്കിങ് നെറ്റ്‌വര്‍ക്ക് ആന്‍ഡ് സിസ്റ്റം നോഡല്‍ ഓഫിസറും ആംഡ് പൊലിസ് ബറ്റാലിയന്‍ ഡി.ഐ.ജിയുമായ പി.പ്രകാശ്, സിസ്റ്റം അനലിസ്റ്റ് മാത്യു സൈമണ്‍ എന്നിവരുടെ ശ്രമഫലമായാണ് ഈ പദ്ധതി രൂപീകൃതമായത്. പരാതി നല്‍കുന്ന സമയത്ത് മൊബൈല്‍ നമ്പര്‍കൂടി നല്‍കണം.ആ മൊബൈല്‍ നമ്പറിലേക്കാണ് വിവരങ്ങള്‍ ലഭ്യമാക്കുക.
സന്ദേശങ്ങള്‍ ലഭിക്കാത്തവര്‍ സംസ്ഥാന പൊലിസ് കണ്‍ട്രോള്‍ റൂമുമായി ബന്ധപ്പെടണം.(0471 2722500)