കണ്ണൂര്‍: ട്രോളിങ് നിരോധനം ആരംഭിച്ചതോടെ അഴീക്കല്‍ തീരത്ത് ഇതരസംസ്ഥാന തൊഴിലാളികളുടെ ബോട്ടുകള്‍ സ്വദേശവാസികളായ മത്സ്യത്തൊഴിലാളികളുടെ ബോട്ടുകള്‍ക്ക് ബുദ്ധിമുട്ടാകുന്നു. പ്രദേശവാസികളുടെ ബോട്ടുകള്‍ നിര്‍ത്തിയിരുന്ന സ്ഥാനത്ത് തമിഴ്‌നാട്, കര്‍ണാടക അടക്കമുള്ള ഇതരസംസ്ഥാന ബോട്ടുകള്‍ നിര്‍ത്തിയിടുന്നതാണ് പ്രയാസം സൃഷ്ടിക്കുന്നത്. അഞ്ചു മുതല്‍ എട്ട് വരെ ബോട്ടുകളാണ് കൂട്ടമായി ഇവിടെ നിര്‍ത്തിയിടുന്നത്.
എല്ലാ വര്‍ഷവും കാലവര്‍ഷമാരംഭിക്കുമ്പോഴേക്കും എത്തുന്ന ഇവര്‍ ട്രോളിങ് നിരോധനം അവസാനിക്കുന്നത് വരെ ഇവിടെയുണ്ടാവും. ഇതിനെതിരേ പ്രദേശത്തെ മത്സ്യത്തൊഴിലാളികള്‍ നിരവധി തവണ ബന്ധപ്പെട്ടവര്‍ക്ക് പരാതി നല്‍കിയെങ്കിലും നടപടിയുണ്ടായില്ലെന്ന് ഇവര്‍ ആരോപിക്കുന്നു. ഇവിടെ നിര്‍ത്തിയിടുന്ന ഇതരസംസ്ഥാന ബോട്ടുകള്‍ മാറ്റിയിടണമെന്നാണ് സ്വദേശവാസികളുടെ ആവശ്യം.