കാബൂള്‍: അഫ്ഗാനിസ്താനില്‍ സൈനിക ഹെലികോപ്റ്റര്‍ തകര്‍ന്ന് 25 പേര്‍ മരിച്ചു. പടിഞ്ഞാറന്‍ അഫ്ഗാനിസ്താനിലെ അനര്‍ദാറ ജില്ലയിലായിരുന്നു അപകടം. രണ്ട് പൈലറ്റുമാരും 23 യാത്രക്കാരുമാണ് ഹെലികോപ്റ്ററിലുണ്ടായിരുന്നത്.
മോശം കാലാവസ്ഥയെ തുടര്‍ന്ന് വിമാനം പര്‍വതത്തിലേക്ക് തകര്‍ന്നുവീഴുകയായിരുന്നുവെന്ന്് ഫറ പ്രവിശ്യ ഗവര്‍ണറുടെ വക്താവ് പറഞ്ഞു. അനര്‍ദാറയില്‍ നിന്ന് രാവിലെ 9.10ന് ഹെലികോപ്റ്റര്‍ പറന്നുയര്‍ന്നതിനു പിന്നാലെയാണ് അപകടമുണ്ടായത്.
സമീപത്തെ ഹെറാത്ത് പ്രവിശ്യയിലേക്കായിരുന്നു ഹെലികോപ്റ്റര്‍ സഞ്ചരിച്ചിരുന്നത്.
എന്നാല്‍, ഹെലികോപ്റ്റര്‍ തങ്ങള്‍ വെടിവച്ചിട്ടതാണെന്ന് താലിബാന്‍ അവകാശപ്പെട്ടു. സെപ്റ്റംബറില്‍ ആയുധങ്ങളുമായി പറന്നുയര്‍ന്ന സൈനിക ഹെലികോപ്റ്റര്‍ ലാന്‍ഡിങ്ങിനിടെ ഫറ പ്രവിശ്യയില്‍ തകര്‍ന്നിരുന്നു. അപകടത്തില്‍ നാലുപേര്‍ കൊല്ലപ്പെട്ടിരുന്നു.