മുംബൈ: മഹാരാഷ്ട്ര നിയമസഭാ തെരഞ്ഞെടുപ്പില്‍ കോണ്‍ഗ്രസും എന്‍.സി.പിയും സീറ്റു ചര്‍ച്ചയില്‍ ധാരണയായി. ഭരണകക്ഷിയായ ബി.ജെ.പിക്കെതിരേ ശക്തമായ മുന്നേറ്റം നടത്തുകയെന്ന ലക്ഷ്യവുമായി സഖ്യം രൂപീകരിച്ച ഇരു പാര്‍ട്ടികളും 125 സീറ്റുകളില്‍ വീതം മത്സരിക്കും. 38 സീറ്റുകള്‍ മറ്റ് സഖ്യകക്ഷികള്‍ക്കായി നല്‍കാനും ഇരുപാര്‍ട്ടികളും തമ്മില്‍ നടന്ന ചര്‍ച്ചയില്‍ ധാരണയായതായി എന്‍.സി.പി അധ്യക്ഷന്‍ ശരത്പവാര്‍ പറഞ്ഞു.
തെരഞ്ഞെടുപ്പില്‍ എന്‍.സി.പി പുതുമുഖങ്ങളെയായിരിക്കും രംഗത്തിറക്കുക. ചില സീറ്റുകളില്‍ വിജയ സാധ്യത മുന്‍നിര്‍ത്തി പരസ്പരം വച്ചുമാറുമെന്നും പവാര്‍ അറിയിച്ചു. മഹാരാഷ്ട്ര നിയമ സഭയില്‍ 288 സീറ്റുകളാണുള്ളത്.
അതേസമയം കോണ്‍ഗ്രസിലേയും എന്‍.സി.പിയിലെയും ചില മുതിര്‍ന്ന നേതാക്കള്‍ രാജിവച്ച് ബി.ജെ.പിയിലും ശിവസേനയിലും ചേര്‍ന്നത് ഇരു പാര്‍ട്ടികള്‍ക്കും വലിയ തിരിച്ചടിയാണ് ഉണ്ടാക്കിയിട്ടുള്ളത്. 13 നിയമസഭാംഗങ്ങളും 10 മുന്‍മന്ത്രിമാരും ഉള്‍പ്പടെ 24 മുതിര്‍ന്ന നേതാക്കളാണ് ബി.ജെ.പിയിലേക്കും ശിവസേനയിലേക്കും മാറിയിരുന്നത്.
2014ല്‍ കോണ്‍ഗ്രസും എന്‍.സി.പിയും സഖ്യം ഉപേക്ഷിച്ചായിരുന്നു മത്സരിച്ചിരുന്നത്. സീറ്റ് വിഭജന ചര്‍ച്ച സമവായത്തിലെത്താത്തതിനെ തുടര്‍ന്നാണ് 15 വര്‍ഷം നീണ്ട സഖ്യം ഇരുപാര്‍ട്ടികളും അവസാനിപ്പിച്ചിരുന്നത്. ഈ തെരഞ്ഞെടുപ്പില്‍ കോണ്‍ഗ്രസിന് 42 സീറ്റുകളും എന്‍.സി.പിക്ക് 41ഉം സീറ്റുകളാണ് ലഭിച്ചത്. 122 സീറ്റുകളുമായി നിയമസഭയില്‍ ഏറ്റവും വലിയ ഒറ്റകക്ഷിയായി ബി.ജെ.പി അധികാരത്തിലേറുകയും ചെയ്തു.