ന്യൂഡല്‍ഹി: രാജ്യത്ത് രൂക്ഷമായ തൊഴില്‍ ക്ഷാമത്തെ ന്യായീകരിക്കാന്‍ നടത്തിയ പ്രസ്താവന കേന്ദ്ര തൊഴില്‍മന്ത്രി സന്തോഷ് കുമാര്‍ ഗംഗ്വാറിനെതിരെ തിരിഞ്ഞുകുത്തി. വ്യാജ പ്രസ്താവന നടത്തുക, കലാപത്തിന് വഴിയൊരുക്കുക തുടങ്ങിയ വകുപ്പുകള്‍ ചേര്‍ത്ത് കേസെടുത്തിരിക്കുകയാണ് ബിഹാറില്‍ മുസാഫര്‍പുര്‍ ചീഫ് മെട്രോപോളിറ്റന്‍ മജിസ്‌ട്രേറ്റ്.

രാജ്യത്ത് തൊഴില്‍ ക്ഷാമമില്ലെന്നും ആവശ്യമായ വിദ്യാഭ്യാസ യോഗ്യതയില്ലാത്തതു കൊണ്ടാണ് ഉത്തരേന്ത്യക്കാര്‍ക്ക് ജോലി ലഭിക്കാത്തതെന്നുമായിരുന്നു ഗംഗ്വാറിന്റെ പ്രസ്താവന. ഇതു വിവാദമാവുകയും സാമൂഹ്യപ്രവര്‍ത്തക തമന്ന ഹാഷ്മി കോടതിയെ സമീപിക്കുകയുമായിരുന്നു.

പരാതി പരിഗണിച്ച മജിസ്‌ട്രേറ്റ് സൂര്യകാന്ത് തിവാരിയാണ് കേസെടുത്തത്. കേസ് സെപ്റ്റംബര്‍ 25ന് വീണ്ടും പരിഗണിക്കും.

രാജ്യത്ത് തൊഴിലില്ലായ്മയില്ലെന്നും 'യോഗ്യതയുള്ളവര്‍' ഇല്ലെന്നാണ് റിക്രൂട്ടര്‍മാര്‍ പറയുന്നതെന്നുമായിരുന്നു മന്ത്രിയുടെ പ്രസ്താവന. മേഖലയിലെ ജനങ്ങളെ അപമാനിക്കുന്നതാണ് മന്ത്രിയുടെ പ്രസ്താവനയെന്ന് പ്രിയങ്കാ ഗാന്ധി അടക്കമുള്ള പ്രതിപക്ഷ നേതാക്കള്‍ ആരോപിച്ചു.