താഷ്‌കെന്റ് (ഉസ്‌ബെകിസ്ഥാന്‍): അണ്ടര്‍ 16 ഏഷ്യന്‍ ഫുട്‌ബോള്‍ ചാംപ്യന്‍ഷിപ്പ് യോഗ്യതാ മത്സരത്തില്‍ ഇന്ത്യക്ക് മികച്ച തുടക്കം. തുര്‍ക്ക്‌മെനിസ്ഥാനെതിരേ ഗോള്‍മഴ പെയ്യിച്ചാണ് ഇന്ത്യന്‍ കൗമാരപ്പട കരുത്തുകാട്ടിയത്. എതിരില്ലാത്ത അഞ്ചു ഗോളുകള്‍ക്കായിരുന്നു ഇന്ത്യയുടെ ജയം. ഇന്ത്യക്കായി ശ്രീദാര്‍ഥ് (40,90) ഇരട്ട ഗോള്‍ നേടിയപ്പോള്‍ ശുഭോ പോള്‍ (23), തൈസന്‍ സിങ് (55), ഹിമാന്‍ഷു ജാംഗ്ര (90) എന്നിവര്‍ ഓരോ ഗോളും നേടി. ജയത്തോടെ ഇന്ത്യ ഉസ്‌ബെകിസ്ഥാനും ബഹ്‌റൈനും ഉള്‍പ്പെടുന്ന ഗ്രൂപ്പ് ബിയില്‍ ഒന്നാം സ്ഥാനത്തെത്തി. ഗ്രൂപ്പിലെ മറ്റൊരു മത്സരത്തില്‍ ഉസ്‌ബെകിസ്ഥാന്‍ ബഹ്‌റൈനെ 3-1ന് പരാജയപ്പെടുത്തി.