തിരുവനന്തപുരം: കൊച്ചി മെട്രോ യു.ഡി.എഫിന്റെ കുട്ടിയാണെന്നും ഉദ്ഘാടന ചടങ്ങ് ബഹിഷ്‌കരിക്കില്ലെന്നും വ്യക്തമാക്കി പ്രതിപക്ഷ നേതാവ് രമേശ് ചെന്നിത്തല. ഉദ്ഘാടന വേദിയില്‍ നിന്ന് ഒഴിവാക്കിയെന്ന വാര്‍ത്തയോട് പ്രതികരിക്കുകയായിരുന്നു അദ്ദേഹം. 

ക്ഷണിച്ചാലും ക്ഷണിച്ചില്ലെങ്കിലും ചടങ്ങ് ബഹിഷ്‌കരിക്കാന്‍ പോകുന്നില്ല. ഇനി എന്തു വേണമെന്ന് നാളെ ചേരുന്ന എം.എല്‍.എമാരുടെ യോഗത്തില്‍ തീരുമാനിക്കുമെന്നും അദ്ദേഹം പറഞ്ഞു.

ചടങ്ങില്‍ ആരെല്ലാം സംബന്ധിക്കണമെന്ന് തീരുമാനിക്കേണ്ടത് സര്‍ക്കാരാണ്. സ്ഥലം എം.പി, എം.എല്‍.എ അടക്കമുള്ളവരെ ക്ഷണിക്കുകയെന്നത് സ്വാഭാവിക നടപടിയാണ്. അതിന്റെ പേരില്‍ ചടങ്ങ് വിവാദമാക്കാന്‍ ആഗ്രഹിക്കുന്നില്ലെന്നും ഉദ്ഘാടന ചടങ്ങില്‍ കല്ലുകടി ഉണ്ടാവാതിരിക്കാന്‍ സര്‍ക്കാര്‍ ശ്രദ്ധിക്കണമായിരുന്നുവെന്നും അദ്ദേഹം പറഞ്ഞു.