മാള: ബധിര യുവാവിനെ ആക്രമിച്ച് പരുക്കേല്‍പ്പിച്ച സംഭവത്തിലെ പൊലിസ് അനാസ്ഥയില്‍ പ്രതിഷേധം ശക്തമാകുന്നു. മാള കിഴക്കേ അങ്ങാടിയില്‍ നമ്പാടന്‍ വീട്ടില്‍ ബെന്നി (45)യാണ് കഴിഞ്ഞ തിങ്കളാഴ്ച ആക്രമിക്കപ്പെട്ടത്. വീട്ട് മുറ്റത്ത് ചെടി നനച്ചു കൊണ്ടിരിക്കെ കാറില്‍ എത്തിയവര്‍ ആക്രമിക്കുയായിരുന്നു. മര്‍ദനമേറ്റ ബെന്നി ഗുരുതര പരുക്കേറ്റ് സ്വകാര്യ ആശുപത്രിയില്‍ ചികിത്സയിലാണ്. മാള പള്ളിപ്പുറം സ്വദേശി സിനോജ് എന്നയാളാണ് തന്നെ ആക്രമിച്ചതെന്ന് ബധിര യുവാവ് പൊലിസിനെ ധരിപ്പിച്ചിരുന്നു.
സംഭവം നടന്ന് മൂന്ന് ദിവസങ്ങള്‍ പിന്നിട്ടിട്ടും പ്രതിയെ പിടി കൂടാത്ത പൊലിസ് നടപടിയില്‍ മാള പഞ്ചായത്ത് യു. ഡി. എഫ് അംഗങ്ങളായ ടി. കെ ജിനേഷ്, വര്‍ഗീസ് വടക്കന്‍, ജൂലി ബെന്നി, സ്മിതാ ഫ്രാന്‍സിസ് എന്നിവര്‍ പ്രതിഷേധിച്ചു. മാള സ്വദേശിയും ക്രിമിനല്‍ കേസില്‍ പ്രതിയുമായ സിനോജിനെ ഉടന്‍ അറസ്റ്റ് ചെയ്യണമെന്നാവശ്യപ്പെട്ടു. സംഭവത്തിലെ പൊലിസ് നിലപാടില്‍ യൂത്ത് കോണ്‍ഗ്രസ് പ്രതിഷേധിച്ചു. ഷിന്റോ എടാട്ടുകാരന്‍, സോയ് കോലഞ്ചേരി, ജോഷി പെരേപാടന്‍ സംസാരിച്ചു.
അക്രമികള്‍ സഞ്ചരിച്ചിരുന്ന കാര്‍ പൊലിസ് കസ്റ്റഡിയിലെടുത്തിട്ടുണ്ട്. സംഭവത്തില്‍ മാള പൊലിസ് കേസെടുത്തിരുന്നു.