മാനന്തവാടി: കഞ്ചാവുമായി ബൈക്കിലെത്തിയ യുവാക്കള്‍ എക്‌സൈസ് ചെക്ക്‌പോസ്റ്റിലെ ക്രോസ് ബാര്‍ ഇടിച്ച് തകര്‍ത്തു. രണ്ട് എക്‌സൈസ് ഉദ്യോഗസ്ഥര്‍ക്ക് പരുക്കേറ്റു. പ്രിവന്റീവ് ഓഫിസര്‍ തരുവണ നിരപ്പേല്‍ കെ.ജെ സന്തോഷ് (43), സിവില്‍ എക്‌സൈസ് ഓഫിസര്‍ തിരുവനന്തപുരം സ്വദേശി വി.വി ഹൗസില്‍ വിപിന്‍ വില്‍സണ്‍ (25) എന്നിവര്‍ക്കാണ് പരുക്കേറ്റത്. വെള്ളിയാഴ്ച ഉച്ചയ്ക്ക് 12.30നാണ് സംഭവം. ബാവലി ചെക്ക്‌പോസ്റ്റില്‍ വാഹന പരിശോധന നടത്തുന്നതിനിടെ ഉദ്യോഗസ്ഥരെ മറികടന്ന് പോകാനുള്ള ശ്രമത്തിനിടെയാണ് ബൈക്ക് ക്രോസ് ബാറിലിടിച്ചത്. ഇടിയുടെ ആഘാതത്തില്‍ ചെക്ക്‌പോസ്റ്റിന്റെ ബാര്‍ തെറിച്ച് ഉദ്യോഗസ്ഥരുടെ ദേഹത്ത് പതിക്കുകയായിരുന്നു.
മാനന്തവാടി കണിയാരം തോപ്പില്‍ ഋഷികേശ്(19), കാരക്കാമല വിജിത്ത് നിവാസില്‍ നിഖില്‍ (20) എന്നിവരാണ് ബൈക്കിലുണ്ടായിരുന്നത്. പരുക്കേറ്റ രണ്ട് എക്‌സൈസ് ഉദ്യോഗസ്ഥരെയും മാനന്തവാടി ജില്ലാ ആശുപത്രിയില്‍ പ്രവേശിപ്പിച്ചു. തുടര്‍ന്ന് നടന്ന പരിശോധനയില്‍ സന്തോഷിന്റെ കാലിന്റെ അസ്ഥി മൂന്നിടത്ത് പൊട്ടിയതായി കണ്ടെത്തി. ഇയാളെ വിദഗ്ധ ചികിത്സക്കായി കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി. വിപിന്റെ കൈയിലെ അസ്ഥിക്ക് പൊട്ടലുണ്ട്. യുവാക്കളില്‍ നിന്നു കഞ്ചാവ് കണ്ടെടുത്തതായി ഉദ്യോഗസ്ഥര്‍ പറഞ്ഞു. തിരുനെല്ലി പൊലിസ് അറസ്റ്റ് ചെയ്ത പ്രതികളെ ഇന്ന് കോടതിയില്‍ ഹാജരാക്കും.