ലഖ്‌നൗ: ലൈംഗിക പീഡനക്കേസില്‍ മുതിര്‍ന്ന ബി.ജെ.പി നേതാവും മുന്‍ കേന്ദ്രമന്ത്രിയുമായ സ്വാമി ചിന്മയാനന്ദ് അറസ്റ്റില്‍. ചിന്മയാനന്ദ് ഡയരക്ടറായ എസ്.എസ് ലോ കോളജിലെ ബിരുദാനന്തര ബിരുദ വിദ്യാര്‍ഥിനി നല്‍കിയ പരാതിയിലാണ് അറസ്റ്റ്.

ഉത്തര്‍പ്രദേശിലെ ഷാജഹാന്‍പൂരില്‍ നിന്നുള്ള പെണ്‍കുട്ടി ഫേസ്ബുക്ക് വിഡിയോയിലൂടെയാണ് ബി.ജെ.പി നേതാവിനെതിരായ വെളിപ്പെടുത്തല്‍ നടത്തിയത്.

ചിന്മയാനന്ദിനെ കുടുക്കാനുള്ള തെളിവുകള്‍ തന്റെ പക്കലുള്ളതിനാല്‍ അദ്ദേഹം തന്നെ കൊല്ലുമെന്ന് ഭീഷണിപ്പെടുത്തിയതായി പെണ്‍കുട്ടി ആരോപിച്ചിരുന്നു. പ്രധാനമന്ത്രി നരേന്ദ്രമോദിയുടേയും ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിന്റേയും സഹായവും അഭ്യര്‍ഥിച്ചിരുന്നു.

2011ല്‍ പെണ്‍കുട്ടിയെ തട്ടിക്കൊണ്ടുപോയി ബലാത്സംഗം ചെയ്തതുമായി ബന്ധപ്പെട്ട് ഇയാള്‍ക്കെതിരെ ഉണ്ടായിരുന്ന കേസ് കഴിഞ്ഞവര്‍ഷം യോഗി സര്‍ക്കാര്‍ പിന്‍വലിച്ചിരുന്നു. സ്വാമിയുടെ ആശ്രമത്തില്‍ ഏറെക്കാലം താമസിച്ച പെണ്‍കുട്ടിയായിരുന്നു പരാതിക്കാരി.