കണ്ണൂർ: ജില്ലയിലെ കൂത്തുപറമ്പ് ചെറുവാഞ്ചേരിയിൽ പൊലിസുകാരന്റെ വീടിന് നേരെ ബോംബേറ്. കണ്ണവം പൊലിസ് സ്റ്റേഷനിലെ സ്‌പെഷ്യൽ ബ്രാഞ്ച് ഉദ്യോഗസ്ഥന്റെ വീടിന് നേരെയാണ് ആക്രമണമുണ്ടായത്. ആക്രമണത്തിൽ ബോംബ് പൊട്ടിത്തെറിക്കാത്തതിനാൽ വൻ ദുരന്തം ഒഴിവായി.

ആക്രമണം നടത്തിയത് ബൈക്കിലെത്തിയ രണ്ടംഗ സംഘം

ഇന്ന് പുലർച്ചെയാണ് സംഭവം നടന്നത്. ബൈക്കിലെത്തിയ രണ്ടംഗ സംഘമാണ് ആക്രമണത്തിന് പിന്നിലെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്. ബോംബ് വീടിന് നേരെ എറിഞ്ഞതാണോ അതോ ഭീഷണിപ്പെടുത്താനായി വീടിന് മുന്നിൽ കൊണ്ടുവെച്ചതാണോ എന്ന കാര്യത്തിൽ പൊലിസ് പരിശോധന നടത്തിവരികയാണ്.

പൊലിസ് നടപടികൾ

സംഭവത്തെത്തുടർന്ന് സ്ഥലത്തെത്തിയ പൊലിസ് പ്രദേശം വളയുകയും പരിശോധന നടത്തുകയും ചെയ്തു. ബോംബ് സ്‌ക്വാഡും വിരലടയാള വിദഗ്ധരും സ്ഥലത്തെത്തി തെളിവുകൾ ശേഖരിച്ചിട്ടുണ്ട്.പ്രദേശത്തെ സിസിടിവി ദൃശ്യങ്ങൾ പൊലിസ് പരിശോധിച്ചു വരികയാണ്.പ്രതികളെ തിരിച്ചറിയുന്നതിനായി അന്വേഷണം ഊർജിതമാക്കി.ഡ്യൂട്ടിയുമായി ബന്ധപ്പെട്ട എന്തെങ്കിലും വൈരാഗ്യമാണോ ആക്രമണത്തിന് പിന്നിലെന്ന് പൊലിസ് പരിശോധിക്കുന്നുണ്ട്.സംഭവത്തിൽ കർശന നടപടി സ്വീകരിക്കുമെന്നും പ്രതികളെ ഉടൻ നിയമത്തിന് മുന്നിൽ കൊണ്ടുവരുമെന്നും പൊലിസ് അറിയിച്ചു.