നടുവണ്ണൂര്‍: ഗ്രാമപഞ്ചായത്തിന്റെ പരിധിയില്‍ പൊതുസ്ഥലങ്ങളില്‍ സ്ഥാപിച്ച പരസ്യ ബോര്‍ഡുകളും മറ്റും നീക്കം ചെയ്യുമ്പോള്‍ മറുഭാഗത്ത് അങ്ങാടിയില്‍ പുതിയ ബോര്‍ഡുകള്‍ പ്രത്യക്ഷപ്പെട്ടു.
മന്ത്രിമാര്‍ പങ്കെടുക്കുന്ന പരിപാടിയുടെ ഫോട്ടോ പതിച്ച ഫ്‌ളക്‌സുകളും ഡി.വൈ.എഫ്.ഐ സമ്മേളനങ്ങളുടെ ബോര്‍ഡുകളും മറ്റുമാണ് നടുവണ്ണൂര്‍ ബസ് സ്റ്റാന്റിന്റെ മുന്നില്‍ സ്ഥാപിച്ചിട്ടുള്ളത്. ഇടതുപക്ഷം ഭരിക്കുന്ന പഞ്ചായത്തില്‍ ഭരണ സമിതിയുടെ നേതൃത്വത്തില്‍ വിളിച്ചു ചേര്‍ത്ത സര്‍വകക്ഷി യോഗമാണ് ബോര്‍ഡുകള്‍ എടുത്തു മാറ്റാന്‍ തീരുമാനിച്ചത്.
നടുവണ്ണൂര്‍ സ്റ്റാന്റിലേക്കു പ്രവേശിക്കുന്ന ഭാഗത്തു ബോര്‍ഡ് വച്ചതിനാല്‍ ഡ്രൈവര്‍മാര്‍ക്ക് എതിര്‍ദിശയില്‍ നിന്നു വരുന്ന വാഹനങ്ങള്‍ കണാന്‍ കഴിയുന്നില്ലെന്ന പരാതി ഉയര്‍ന്നതിനാല്‍ ഇവിടെയുള്ള മുഴുവന്‍ ബോര്‍ഡുകളും മാറ്റുകയായിരുന്നു. ഇവ എടുത്തു മാറ്റിയതിന്റെ പിറ്റേ ദിവസം തന്നെ പുതിയ ബോര്‍ഡുകള്‍ സ്ഥാപിച്ചതില്‍ ഡ്രൈവര്‍മാരും നാട്ടുകാരും പ്രതിഷേധിച്ചു.