മാഹി: മലയാള സാഹിത്യത്തിലെ ഏറ്റവും ഉന്നതമായ ബഹുമതിയായ എഴുത്തച്ഛന്‍ പുരസ്‌കാരം മയ്യഴിയുടെ കഥാകാരന് ലഭിച്ചതില്‍ മലയാളികള്‍ക്കൊപ്പം മയ്യഴിയും ഏറെ അഭിമാനിക്കുന്നുവെന്ന് ഡോ. വി. രാമചന്ദ്രന്‍ എം.എല്‍.എ. എഴുത്തച്ഛന്‍ പുരസ്‌കാരം ലഭിച്ച കഥാകാരനെ അഭിനന്ദിക്കാന്‍ അദ്ദേഹത്തിന്റെ മയ്യഴി സെമിത്തേരി റോഡിലെ സരോവരത്തില്‍ എത്തിയതായിരുന്നു അദ്ദേഹം.
മുകുന്ദനൊപ്പം മയ്യഴിയും മലയാളിയും മലയാള സാഹിത്യവും ലോകത്തിന് മുന്നില്‍ തലയുയര്‍ത്തി നില്‍ക്കുകയാണ്. സമൂഹത്തിന്റെ അടിത്തട്ടിലുള്ളവരുടെ ജീവിതമാണ് മുകുന്ദന്‍ തന്റെ കഥകള്‍ക്ക് വിഷയമാക്കിയിട്ടുള്ളത്. മുകുന്ദന്റെ നോവലുകളിലെ കഥാപാത്രങ്ങള്‍ സംസാരിക്കുന്നത് ആ പ്രദേശത്തിന്റെ നാട്ടുഭാഷയാണ്. ഫ്രഞ്ച് കോളനിയായിരുന്ന മയ്യഴിയുടെ വിമോചന സമരത്തിന്റെ ഇതിഹാസമാണ് മയ്യഴിപ്പുഴയുടെ തീരങ്ങളിലെന്നും ഡോ. വി. രാമചന്ദ്രന്‍ എം.എല്‍.എ പറഞ്ഞു.