തിരൂര്‍: വാഹനങ്ങള്‍ അഗ്‌നിക്കിരയാക്കിയതിന് തൊട്ടുപിന്നാലെ പറവണ്ണ മേഖലയില്‍ വീണ്ടും തീക്കളി. വെട്ടം പഞ്ചായത്തിന്റെ ലക്ഷങ്ങളുടെ കയര്‍ഭൂവസ്ത്രം ഇന്നലെ പുലര്‍ച്ചെ സാമൂഹ്യവിരുദ്ധര്‍ തീയിട്ട് നശിപ്പിച്ചു. മണ്ണൊലിപ്പ് തടയാന്‍ കയര്‍ ഭൂവസ്ത്ര വിരിപ്പിനായി ആലപ്പുഴയില്‍ നിന്നും കൊണ്ടുവന്ന് സൂക്ഷിച്ചിരുന്ന കയര്‍ വസ്ത്രമാണ് തീയിട്ട് നശിപ്പിച്ചത്. പുലര്‍ച്ചെ മൂന്ന് മണിയോടെ വിവരമറിഞ്ഞെത്തിയ നാട്ടുകാരും ഫയര്‍ഫോഴ്‌സും ചേര്‍ന്നാണ് തീയണച്ചത്.
ആലിന്‍ ചുവട്ടിലെ പള്ളി വളപ്പിലാണ് ഇത് സൂക്ഷിച്ചിരുന്നത്. ആവിപ്പുഴ തോടില്‍ മണ്ണൊലിപ്പ് തടയാനുള്ള കയര്‍ ഭൂവസ്ത്ര വിതരണ ജോലി ശക്തമായ മഴയെ തുടര്‍ന്ന് തടസ്സപ്പെട്ടിരുന്നു. കഴിഞ്ഞ ഏപ്രില്‍ 12നാണ് കയര്‍ വസ്ത്രം എത്തിച്ചത് .
4356 സ്‌ക്വയര്‍ മീറ്റര്‍ കയര്‍ വസ്ത്രം എത്തിച്ചതില്‍ 2160 സ്‌ക്വയര്‍ മീറ്റര്‍ ഉപയോഗിച്ചു. ബാക്കിയുള്ളതിനാണ് തീയിട്ടത്. പഞ്ചായത്തിന് ഇവ സൂക്ഷിക്കാന്‍ പറ്റിയ ഗോഡൗണ്‍ ഇല്ലാത്തതിനാല്‍ ആളൊഴിഞ്ഞ പുരയിടത്തിലാണ് സൂക്ഷിച്ചിരുന്നത്. മെയ് മാസത്തില്‍ തൊഴിലുറപ്പ് പദ്ധതി പ്രകാരം ഇവ വിരിച്ചു തുടങ്ങി. പിന്നീട് മഴയും പ്രളയവുമെല്ലാം വന്നതോടെ പുഴയില്‍ വെള്ളം ഉയര്‍ന്നതിനാല്‍ ജോലികള്‍ മുടങ്ങി. വെള്ളം ഇറങ്ങിയാല്‍ മാത്രമേ കയര്‍ വസ്ത്രം വിരിക്കാനാകൂ. കയര്‍ മേഖലയെ പുനരുദ്ധരിക്കാന്‍ കൂടി ലക്ഷ്യമിട്ടുള്ളതാണ് ഈ പദ്ധതി.
കഴിഞ്ഞ രണ്ട് ദിവസങ്ങളിലായി പ്രദേശത്ത് രണ്ട് വാഹനങ്ങളാണ് അഗ്‌നിക്കിരയാക്കിയത്. സംഭവത്തില്‍ അന്വേഷണം തുടരുന്നതിനിടെയാണ് പഞ്ചായത്ത് മുതലിനും നശിപ്പിച്ചത്. സംഭവത്തെ തുടര്‍ന്ന് പഞ്ചായത്ത് അധികൃതര്‍ പൊലിസില്‍ പരാതി നല്‍കി.