ന്യൂഡല്‍ഹി: കെ.പി.സി.സി പുനസംഘടന സംബന്ധിച്ച് കേരളത്തിലെ നേതാക്കളുമായി കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി ഇന്ന് ചര്‍ച്ച നടത്തും.കെ.പി.സി.സി പ്രസിഡന്റ് വി.എം സുധീരന്‍, പ്രതിപക്ഷ നേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ ചാണ്ടി എന്നിവരുമാണ് രാഹുല്‍ കൂടിക്കാഴ്ച്ച നടത്തുക. വൈകുന്നേരമാണ് കൂടിക്കാഴ്ച്ച നടക്കുക.

വിഎം സുധീരനെ കെപിസിസി അധ്യക്ഷ പദവിയില്‍ നിന്ന് മാറ്റണമെന്ന് ഇന്നത്തെ യോഗത്തിലും ആവശ്യപ്പെടും. എന്നാല്‍ മുന്‍പ് ഇതേ ആവശ്യം ഉന്നയിച്ചപ്പോഴും സാധ്യമല്ലെന്ന നിലപാടാണ് രാഹുല്‍ സ്വീകരിച്ചത്. വി.എം സുധീരനെ മാറ്റാതെയുള്ള പുനസംഘടനയാവും ഹൈക്കമാന്റ് മുന്നോട്ട് വെക്കുക.

യുഡിഎഫുമായി ഇടഞ്ഞ് നില്‍ക്കുന്ന കെ.എം മാണിയെ അനുനയിപ്പിക്കുന്നതിനെകുറിച്ചും കൂടിക്കാഴ്ച്ചയില്‍ ചര്‍ച്ച ചെയ്യും. കോണ്‍ഗ്രസ് പുനസംഘനയുമായി ബന്ധപ്പെട്ട് ഇത് മൂന്നാം തവണയാണ് ചര്‍ച്ച നടക്കുന്നത്. പുനസംഘടന സംബന്ധിച്ച പ്രധാന തീരുമാനങ്ങള്‍ ഇന്നത്തെ കൂടിക്കാഴ്ച്ചയിലുണ്ടായേക്കുമെന്നാണ് പ്രതീക്ഷിക്കുന്നത്.