ന്യൂഡല്‍ഹി: 'ഹൗഡി മോദി' പരിപാടിക്കെതിരേ രൂക്ഷ വിമര്‍ശനവുമായി മുതിര്‍ന്ന കോണ്‍ഗ്രസ് നേതാവ് ആനന്ദ് ശര്‍മ. മോദി അമേരിക്കയിലെത്തിയത് ഇന്ത്യയുടെ പ്രധാനമന്ത്രിയായിട്ടാണെന്നും അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ താരപ്രചാരകനായിട്ടല്ലെന്ന് ഓര്‍ക്കണമെന്നും രാജ്യസഭാ എം.പി കൂടിയായ ആനന്ദ് ശര്‍മ പറഞ്ഞു.
മറ്റൊരു രാജ്യത്തിന്റെ തെരഞ്ഞെടുപ്പില്‍ ഇടപെടാതിരിക്കുകയെന്ന വിദേശനയമാണ് പ്രധാനമന്ത്രി മോദി ലംഘിച്ചിരിക്കുന്നത്. ഹൂസ്റ്റണില്‍ നടന്ന പരിപാടിയില്‍ ട്രംപിനെ മോദി വാനോളം പുകഴ്ത്തിയിരുന്നു. ട്രംപിന്റെ തെരഞ്ഞെടുപ്പ് മുദ്രാവാക്യം പോലും മോദിയുടെ പ്രസംഗത്തില്‍ കടന്നുവന്നുവെന്നും അദ്ദേഹം ആരോപിച്ചു. എന്നാല്‍ ഹൗഡി മോദി പരിപാടിയുടെ വമ്പന്‍ വിജയമാണ് ആരോപണങ്ങള്‍ക്ക് പിന്നിലെന്ന് ബി.ജെ.പി നേതാവ് അമിത് മാളവ്യ തിരിച്ചടിച്ചു.