കരുനാഗപ്പള്ളി: സ്‌കൂള്‍ ബസ് ദേഹത്ത് കയറി വിദ്യാര്‍ഥിക്ക് ദാരുണാന്ത്യം. കൃഷ്ണപുരം ഗവ: യു.പി. സ്‌കൂളിലെ രണ്ടാം ക്ലാസ് വിദ്യാര്‍ഥി റാം ഭഗത്താണ്(7) അതേ സ്‌കൂളിലെ ബസ് കയറി മരിച്ചത്. കായംകുളം തെക്ക് കൊച്ചുമുറി കളരി ക്ഷേത്രത്തിന് സമീപം കവണടിയില്‍ അരുണ്‍ഭാസിയുടെ മകനാണ്.

മാതാവ് കവിത. സഹോദരി അവന്തിക അതേസ്‌കൂളിലെ അഞ്ചാംക്ലാസ് വിദ്യാര്‍ഥിനിയാണ്.
വൈകിട്ട് 4.30ന് കളരിക്ഷേത്രത്തിന് സമീപമുള്ള വീടിനുമുന്നിലായിരുന്നു അപകടം. ഇരുവരും സ്‌കൂള്‍ ബസില്‍ വീടിന് മുന്നില്‍ ഇറങ്ങി ബസിന് മുന്നില്‍ കൂടി റോഡ് മുറിച്ചുകടക്കുമ്പോള്‍ ഡ്രൈവര്‍ ബസ് മുന്നോട്ട് എടുക്കുകയായിരുന്നു. വിദ്യാര്‍ഥിയുടെ ശിരസില്‍കൂടി ബസ് കയറിയിറങ്ങി. മൃതദേഹം ഓച്ചിറ പരബ്രഹ്മ ആശുപത്രി മോര്‍ച്ചറിയില്‍. ഡ്രൈവര്‍ കുഞ്ഞുമോനെ കായംകുളം പൊലിസ് കസ്റ്റഡിയിലെടുത്തു.