തിരുവനന്തപുരം: നദീജല കൈമാറ്റം സംബന്ധിച്ച് കേരളവും തമിഴ്‌നാടും തമ്മിലുള്ള തര്‍ക്കം പരിഹരിക്കുന്നതിന് മുഖ്യമന്ത്രിതല ചര്‍ച്ച ഇന്ന് തിരുവനന്തപുരത്ത് നടക്കും. വൈകിട്ട് മൂന്നിന് മസ്‌കോട്ട് ഹോട്ടലില്‍ നടക്കുന്ന ചര്‍ച്ചയില്‍ കേരള മുഖ്യമന്ത്രി പിണറായി വിജയനും തമിഴ്‌നാട് മുഖ്യമന്ത്രി എടപ്പാടി പളനിസ്വാമിയും ഇരുസംസ്ഥാനങ്ങളില്‍ നിന്നുള്ള മന്ത്രിമാരും ഉന്നത ഉദ്യോഗസ്ഥരും പങ്കെടുക്കും. പറമ്പിക്കുളം-ആളിയാര്‍ കരാര്‍ പുനരവലോകനമാണ് ചര്‍ച്ചയിലെ പ്രധാന അജന്‍ഡ. നദീജല കരാര്‍ വ്യവസ്ഥകള്‍ എത്രത്തോളം പാലിക്കപ്പെട്ടിട്ടുണ്ടെന്ന് യോഗം വിലയിരുത്തും. അതേസമയം ഇരുസംസ്ഥാനങ്ങള്‍ക്കും വിട്ടുവീഴ്ച ചെയ്യാന്‍ പ്രയാസമുള്ള വിഷയങ്ങളായതിനാല്‍ ചര്‍ച്ചയുടെ ഫലപ്രാപ്തിയില്‍ ആശങ്കയുണ്ട്. എങ്കിലും ഇരുസംസ്ഥാനങ്ങളും കടുത്ത നിലപാടുകള്‍ സ്വീകരിക്കില്ലെന്ന പ്രതീക്ഷയാണ് ജലവിഭവവകുപ്പ് ഉന്നതാധികാരികള്‍ പങ്കുവയ്ക്കുന്നത്.
നദീജല തര്‍ക്കവുമായി ബന്ധപ്പെട്ട് പറമ്പിക്കുളം-ആളിയാര്‍ കരാര്‍ വ്യവസ്ഥകള്‍ പൂര്‍ണമായും പാലിക്കപ്പെടണം, തമിഴ്‌നാട് കരാര്‍ പുതുക്കാന്‍ തയാറാകണം, ദേശീയ ട്രൈബ്യൂണല്‍ അനുവദിച്ച 30 ടി.എം.സി കാവേരി ജലത്തിന് തടസം നില്‍ക്കരുത് തുടങ്ങിയ ആവശ്യങ്ങളാണ് കേരളം മുന്നോട്ടു വയ്ക്കുന്നത്. 1970ല്‍ 12 വര്‍ഷം മുന്‍കാല പ്രാബല്യത്തോടെയാണ് (1958 മുതല്‍) പറമ്പിക്കുളം-ആളിയാര്‍ കരാര്‍ നിലവില്‍ വന്നത്. കരാര്‍ നിലവില്‍ വന്ന് 30 വര്‍ഷം തികയുമ്പോള്‍ പുതുക്കണമെന്നാണ് വ്യവസ്ഥയെങ്കിലും തമിഴ്‌നാടിന്റെ നിസ്സഹകരണം മൂലം അതു പാലിക്കപ്പെട്ടിട്ടില്ല.
1988 നവംബര്‍ ഒന്‍പതിന് പുനരവലോകന കാലാവധി കഴിഞ്ഞിരുന്നു. പിന്നീട് വിവിധ തലങ്ങളില്‍ ചര്‍ച്ചകള്‍ നടന്നിരുന്നുവെങ്കിലും തീരുമാനങ്ങളൊന്നും ഉണ്ടായിരുന്നില്ല. ഇതിന്റെ തുടര്‍ച്ചയായാണ് ഇന്നത്തെ ചര്‍ച്ച.