രൂക്ഷമായ സാമ്പത്തിക മാന്ദ്യത്തെ തുടര്‍ന്ന് സഊദി അറേബ്യയിലെ നിര്‍മാണ മേഖലയില്‍ തൊഴില്‍ നഷ്ടപ്പെടുകയും കമ്പനികള്‍ അടച്ചുപൂട്ടിയത് മൂലം മാസങ്ങളായി ലഭിക്കാനുള്ള ശമ്പളവും മറ്റു ആനുകൂല്യങ്ങളും ലഭിക്കാതെ വരികയും ലേബര്‍ ക്യാംപുകളില്‍ ഭക്ഷണമടക്കമുള്ള അടിസ്ഥാന ആവശ്യങ്ങള്‍ നിറവേറ്റാന്‍ സന്നദ്ധ സംഘടനകളുടെ ദയാവായ്പിനായി കാത്തിരിക്കേണ്ടി വരികയും ചെയ്യുന്ന മലയാളികളടക്കമുള്ള ഇന്ത്യക്കാരും വിഷയത്തില്‍ കേന്ദ്ര സംസ്ഥാന സര്‍ക്കരുകള്‍ ക്രിയാത്മകമായ ഇടപെടലുകള്‍ നടത്തണം. എഴുനൂറോളം മലയാളികള്‍ ഈ ഗണത്തില്‍ വരുമെന്നാണ് കണക്കുകള്‍. അവരെ തിരികെ എത്തിക്കുവാനും അങ്ങിനെ മടങ്ങിവന്നവരുടെ കമ്പനിയില്‍ നിന്ന് ലഭിക്കാനുള്ള കുടിശ്ശിക ശമ്പളവും മറ്റാനുകൂല്യങ്ങളും കമ്പനികളില്‍ നിന്ന് ഈടാക്കി നാട്ടില്‍ എത്തിക്കുവാനുള്ള സാഹചര്യം സൃഷ്ടിക്കാനും ഉചിതമായ രീതിയിലുള്ള പുനരധിവാസം ഉറപ്പുവരുത്താനും സംസ്ഥാന സര്‍ക്കാര്‍ സന്നദ്ധമാവണം.

തൊഴില്‍ നഷ്ടപ്പെട്ട പ്രവാസികളുടെ തിരിച്ചു വരവിനാവശ്യമായ നടപടികള്‍ സ്വീകരിച്ച് സൗജന്യ വിമാനം അയക്കുകയും ഒരു സുപ്രഭാതത്തില്‍ എല്ലാം നഷ്ടപ്പെട്ട് തിരികെ എത്തുന്നവരുടെ അഭിരുചിക്കനുസൃതമായ രീതിയില്‍ സ്വയംതൊഴില്‍ സംരഭങ്ങള്‍ ആരംഭിക്കാന്‍ പലിശരഹിത വായ്പ 50 ശതമാനം സബ്‌സിഡി നിരക്കില്‍ അനുവദിക്കാന്‍ ബാങ്കുകളുമായി ധാരണയുണ്ടാക്കണം. സഊദി അറേബ്യയും യു.എ.ഇയുമടക്കം വന്‍തോതില്‍ തൊഴിലാളികളെ ഇറക്കുമതി ചെയ്യപ്പെടുന്ന രാജ്യങ്ങളുമായും ഇന്ത്യപോലെ ഏറ്റവുമധികം തൊഴിലാളികള്‍ വിദേശ രാജ്യങ്ങളിലേക്ക് ചേക്കേറുന്ന രാഷ്ട്രങ്ങള്‍ ശക്തമായ ധാരണയും കരാറുകളും ഉണ്ടാക്കുകയും അവ കൃത്യമായി നടപ്പിലാക്കപ്പെടുന്നുണ്ടന്ന് ഉറപ്പ് വരുത്തുകയും പ്രവാസി സമൂഹത്തിന് ദിശാബോധവും ആത്മവിശ്വാസവും വര്‍ധിപ്പിക്കുവാന്‍ ഭരണ കൂടം തയ്യാറാവണം. കൂടാതെ പ്രവാസി ക്ഷേമത്തിനായി പ്രവര്‍ത്തിക്കുന്ന നോര്‍ക്ക റൂട്ട്‌സ് അടക്കം വിവിധ ഏജന്‍സികളുടെ പ്രവര്‍ത്തനം കാര്യക്ഷമമാക്കാനും സര്‍ക്കാര്‍ ഇടപെടലുകള്‍ ശക്തമാക്കണം.

പി.ഇ ശംസുദ്ദീന്‍