കട്ടക്ക്: ഐ ലീഗ് ഫുട്‌ബോളില്‍ ഇന്ത്യന്‍ ആരോസിന് വിജയം. ഇന്നലെ നടന്ന മത്സരത്തില്‍ ഷില്ലോങ് ലജോങ് എഫ്.സിയെയാണ് ആരോസ് പരാജയപ്പെടുത്തിയത്. മത്സരത്തിന്റെ 11ാം മിനുട്ടില്‍ തന്നെ ആശിഷ് റോയിയിലൂടെ ലീഡെടുത്ത ഇന്ത്യന്‍ ആരോസ് അവസാന മിനുട്ടുവരെ ലജോങ് എഫ്.സിയെ പ്രതിരോധപ്പൂട്ടില്‍ കുടുക്കിയാണ് വിജയം പിടിച്ചെടുത്തത്.
ആദ്യ മത്സരത്തില്‍ ചെന്നൈ സിറ്റി എഫ്.സിയോട് 4-1ന് പരാജയപ്പെട്ട ആരോസ് ഈ മത്സരത്തില്‍ മികച്ച പ്രകടനമാണ് പുറത്തെടുത്തത്. ആദ്യ മത്സരത്തില്‍നിന്ന് അഞ്ച് മാറ്റങ്ങളുമായാണ് ആരോസ് കളത്തിലിറങ്ങിയത്.
ബോറിസ് സിങ്, സുരേഷ് സിങ്, റീംസോച്ചുങ് എയ്‌മോള്‍, ലാലെന്‍ങ്മാവിയ എന്നിവര്‍ ആദ്യ ഇലവനില്‍ സ്ഥാനം പിടിച്ചപ്പോള്‍ ജീതേന്ദ്ര സിങ്, റഹീം അലി, ജീക്ക്‌സണ്‍ സിങ്, സഞ്ജീവ് സ്റ്റാലിന്‍, ഗുര്‍കിറാത് സിങ് എന്നിവര്‍ പുറത്തിരുന്നു. ജയത്തോടെ ആരോസ് പട്ടികയില്‍ മൂന്നാം സ്ഥാനത്തേക്ക് കയറി.