പാലക്കാട്: ശ്വാനസൗഹൃദ പാലക്കാട് ലക്ഷ്യമിട്ട് ജില്ല-ബ്ലോക്ക്-പഞ്ചായത്തുകളും മൃഗസംരക്ഷണവകുപ്പും സംയുക്തമായി നടപ്പാക്കുന്ന അനിമല്‍ ബര്‍ത്ത് കണ്‍ട്രോള്‍ പ്രോഗ്രാം (പ്രജനന നിയന്ത്രണ പരിപാടി) ഇന്ന്  രാവിലെ 10ന് മൃഗസംരക്ഷണം-വനം-ക്ഷീരവികസന വകുപ്പ് മന്ത്രി അഡ്വ. കെ. രാജു ഉദ്ഘാടനം ചെയ്യും.
ജില്ല വെറ്ററിനറി കേന്ദ്രം അങ്കണത്തില്‍ നടക്കുന്ന പരിപാടിയില്‍ ജില്ല പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി അധ്യക്ഷയാവും.
ജില്ല മൃഗസംരകഷണ ഓഫിസര്‍ എസ്. വേണുഗോപാലന്‍ നായര്‍ പദ്ധതി അവതരണം നടത്തും. കെ.വി വിജയദാസ് എം.എല്‍.എ ലോഗോ പ്രകാശനം നടത്തും. കെ. കൃഷ്ണന്‍ കുട്ടി എം.എല്‍.എ എ.ബി.സി ലഘുലേഘ പ്രകാശനം നടത്തും. ഷാഫി പറമ്പില്‍ എം.എല്‍.എ പരിശീലന സര്‍ട്ടിഫിക്കറ്റ് വിതരണം ചെയ്യും.
തെരുവുനായ് പ്രജനന നിയന്ത്രണവും അവയ്ക്കുളള റാബിസ് വാക്‌സിനേഷന്‍ ലൈസന്‍സും പദ്ധതിയില്‍ ഉള്‍പ്പെടും. 2012-ലെ ലൈവ് സ്റ്റോക്ക് സെന്‍സസ് അനുസരിച്ച് ജില്ലയില്‍ നിലവിലുളള ഏകദേശം 70,000 ത്തോളം തെരുവുനായ്ക്കളെ പദ്ധതിയില്‍ ഉള്‍പ്പെടുത്തിയിട്ടുണ്ട്.
ആദ്യഘട്ടത്തില്‍ പദ്ധതി പാലക്കാട്, ആലത്തൂര്‍, ചിറ്റൂര്‍, ഒറ്റപ്പാലം, മണ്ണാര്‍ക്കാട് എന്നിവിടങ്ങളിലാണ് നടപ്പാക്കുക.