ജിദ്ദ: സഊദിയില്‍ വ്യവസായ മേഖലയില്‍ നടപ്പാക്കുന്ന ലെവിയിളവ് വിദേശ തൊഴിലാളികള്‍ക്ക് മാത്രമേ ലഭിക്കൂവെന്നും ആശ്രിത ലെവിയില്‍ മാറ്റമുണ്ടാകില്ലെന്നും വ്യവസായ ധാതുവിഭവ മന്ത്രി ബന്ദര്‍ അല്‍ഖുറൈഫ്. വിദേശ കമ്പനികളുമായി രാജ്യത്തിന്റെ വ്യാവസായിക മേഖലയുടെ മത്സരക്ഷമതയുയര്‍ത്താനാണ് അഞ്ചു വര്‍ഷത്തേക്കുള്ള ലെവിയിളവ്.

നിലവില്‍ വ്യാവസായിക ഉല്‍പന്നങ്ങള്‍ വന്‍തോതില്‍ രാജ്യത്തേക്ക് ഇറക്കുമതി ചെയ്യുന്നുണ്ട്. അതുകൊണ്ട് തന്നെ സഊദിയിലെ വ്യാവസായിക മേഖലയെ സര്‍ക്കാരിന് ശക്തമായി പിന്തുണക്കേണ്ടതുണ്ട്. അതിന്റെ ഭാഗമായാണ് ലെവിയിളവ് തീരുമാനം. അതേസമയം, ആഭ്യന്തര ഉത്പാദന മേഖലയില്‍ മത്സരമുള്ള ചെറുകിടഇടത്തര സ്ഥാപനങ്ങള്‍ക്ക് ലെവിയിളവ് തീരുമാനം ബാധകമല്ലെന്നും അദ്ദേഹം പറഞ്ഞു. കുടുംബങ്ങള്‍ക്ക് ലെവി ഇളവുണ്ടാകുമെന്നും വ്യാപക പ്രചാരണമുണ്ടായിരുന്നു. ഈ പശ്ചാത്തലത്തിലാണ് മന്ത്രിയുടെ പ്രസ്താവന വന്നത്.