ചാവക്കാട്: ഒന്നേകാല്‍ കിലോ കഞ്ചാവുമായി യുവാവ് അറസ്റ്റില്‍. എടക്കഴിയൂര്‍ സ്വദേശിയും തൊട്ടാപ്പ് സുനാമി കോളനിയിലെ താമസക്കാരനുമായ കിഴക്കത്തറ ഷറഫുദ്ധീനെയാണ് (28) നെയാണ് ചാവക്കാട് പൊലിസ് അറസ്റ്റുചെയ്തത്. തൊട്ടാപ്പ് സുനാമി കോളനിയില്‍ വിതരണത്തിന് കൊണ്ടുവന്ന ഒന്നേകാല്‍ കിലോ കഞ്ചാവാണ് ഇയാളില്‍ നിന്ന് പിടികൂടിയതെന്ന് പൊലിസ് പറഞ്ഞു. കോയമ്പത്തൂരില്‍ നിന്ന് വാങ്ങിച്ചു കൊണ്ടുവന്ന കഞ്ചാവുമായി മുനക്കകടവ് ഭാഗത്തേക്ക് ബസ് കാത്തുനില്‍ക്കുന്നതിനിടയില്‍ ചാവക്കാട് ബസ് സ്റ്റാന്‍ഡ് പരിസരത്ത് നിന്ന് ശനിയാഴ്ച രാവിലെ 11നാണ് ഇയാള്‍ പിടിയിലായത്. വ്യാഴാഴ്ച്ച എടക്കഴിയൂര്‍ നാലാം കല്ല് സ്വദേശി അഷറഫിനെ (വികലു) ഒന്നരകിലോ കഞ്ചാവുമായി ബ്ലാങ്ങാട് ബീച്ചില്‍ നിന്ന് പിടികൂടിയിരുന്നു.അഷറഫില്‍ നിന്നാണ് കഞ്ചാവ് മൊത്തവ്യാപാരിയായ ഷറഫുദ്ധീനെ കുറിച്ച് പൊലിസിന് വിവരം ലഭിച്ചത്. അന്ന് പിടികൂടിയ ഷറഫുദ്ധിനെ കഞ്ചാവ് ലഭിക്കാത്തതിനാല്‍ വിട്ടയച്ചുവെന്നാണ് പൊലിസ് പറയുന്നത്.