ന്യൂഡല്‍ഹി: രാഷ്ട്രപിതാവ് മഹാത്മാ ഗാന്ധിയുടെ 150-ാം ജന്മദിന വാര്‍ഷികത്തിന്റെ ഭാഗമായി ഒക്ടോബര്‍ രണ്ടിന് അറുനൂറോളം തടവുകാരെ മോചിപ്പിക്കുന്നു. രാജ്യത്തിന്റെ വിവിധ ഭാഗങ്ങളിലായി കൊലപാതകം, ബലാത്സംഗം, കൈക്കൂലി കേസുകളില്‍ ശിക്ഷ അനുഭവിക്കുന്നവരെയായിരിക്കും മോചിപ്പിക്കുക.

കൃത്യമായ എണ്ണം ഗാന്ധി ജയന്തി ദിനത്തിലാണ് പുറത്തുവിടുക. അറുനൂറോളം പേരെങ്കിലും പട്ടികയിലുണ്ടാകുമെന്നാണ് കരുതപ്പെടുന്നത്. സംസ്ഥാന സര്‍ക്കാരുകളും കേന്ദ്ര ഭരണപ്രദേശ അധികൃതരുമായി കൂടിയാലോചിച്ച ശേഷം കേന്ദ്ര ആഭ്യന്തര മന്ത്രാലയമാണ് അന്തിമ പട്ടിക തയ്യാറാക്കുന്നത്.

ഗാന്ധിജിയുടെ നൂറ്റമ്പതാം ജന്മവാര്‍ഷികത്തിന്റെ ഭാഗമായി വിവിധ സംസ്ഥാനങ്ങള്‍ ഇതിനകം തന്നെ രണ്ടു ഘട്ടങ്ങളിലായി 1,424 തടവുകാരെ വിട്ടയക്കുകയുണ്ടായെന്ന് ഉദ്യോഗസ്ഥര്‍ പറഞ്ഞു. മൂന്നാംഘട്ടമായാണ് ഒക്ടോബര്‍ രണ്ടിന് കൂടുതല്‍ പേരെ വിട്ടയക്കുന്നത്. ശിക്ഷാ കാലാവധിയുടെ പകുതി പിന്നിട്ട 55 വയസുകഴിഞ്ഞ സ്ത്രീകള്‍, 60 വയസുകഴിഞ്ഞ പുരുഷന്മാര്‍ എന്നിവര്‍ വിട്ടയക്കുന്നവരുടെ പട്ടികയില്‍ ഉള്‍പ്പെടും. ട്രാന്‍സ്ജെന്‍ഡേര്‍സ്, അംഗപരിമിതര്‍ എന്നിവര്‍ക്കും വിവിധ മാനദണ്ഡങ്ങള്‍ നിശ്ചയിച്ച് വിടുതല്‍ നല്‍കുന്നതിന് പരിഗണിക്കുന്നുണ്ട്. വധശിക്ഷ , ജീവപര്യന്തം തടവ് എന്നിവ ഒന്നാം ശിക്ഷയായി വിധിക്കപ്പെടവരെ വിടുതലിന് പരിഗണിക്കില്ല.

അഴിമതി നിരോധന നിയമം, ടാഡ, പോട്ട, യുഎപിഎ, പോക്സോ, കള്ളപ്പണം വെളുപ്പിക്കല്‍, വിദേശ വിനിമയ നിയമ ലംഘനം തുടങ്ങിയ കുറ്റങ്ങള്‍ക്ക് ശിക്ഷ അനുഭവിക്കുന്നവര്‍ വിട്ടയക്കപ്പെടുന്നവരുടെ പട്ടികയില്‍ ഇടം പിടിക്കില്ല.