ഡല്‍ഹി: ഹരിയാന നിയമസഭ തെരഞ്ഞെടുപ്പിനുള്ള ആദ്യഘട്ട സ്ഥാനാര്‍ഥി പട്ടിക ബി.ജെ.പി പുറത്തിറക്കി.

ഗുസ്തി താരങ്ങളായ ബബിത ഫോഗട്ട്, യോഗേശ്വര്‍ ദത്ത്, മുന്‍ ഹോക്കി ടീം നായകന്‍ സന്ദീപ് സിങ് എന്നിങ്ങനെ വന്‍ താരനിര അടങ്ങിയ ആദ്യ പട്ടികയില്‍ 78 പേരാണ് ഉള്ളത്. മുഖ്യമന്ത്രി മനോഹര്‍ ലാല്‍ ഖട്ടാര്‍ കഴിഞ്ഞ തവണ വിജയിച്ച കര്‍ണാല്‍ സീറ്റില്‍ നിന്ന് തന്നെ വീണ്ടും ജനവിധി തേടും.ബി.ജെ.പി സംസ്ഥാന അധ്യക്ഷന്‍ സുഭാഷ് ബറാല തോഹാന മണ്ഡലത്തില്‍ നിന്ന് തെരഞ്ഞെടുപ്പില്‍ മത്സരിക്കും. ധനമന്ത്രി ക്യാപ്റ്റന്‍ അഭിമന്യു നര്‍നൗദില്‍ നിന്നും മത്സരിക്കും. ദാദ്രിയില്‍ നിന്നാണ് ബബിത ഫോഗട്ട് തെരഞ്ഞെടുപ്പ് അങ്കത്തിനിറങ്ങുന്നത്.

യോഗേശ്വര്‍ ദത്ത് ബറോഡയില്‍ നിന്നും മത്സരിക്കും. പെഹോവയില്‍ നിന്നാണ് മുന്‍ ഇന്ത്യന്‍ ഹോക്കി ടീ നായകന്‍ സന്ദീപ് സിങ് മത്സരിക്കുന്നത്.