പട്‌ന: പ്രളയത്തില്‍ കൂടുങ്ങിക്കിടന്ന മലയാളി കുടുംബങ്ങളെ രക്ഷപ്പെടുത്തി. പത്തനംതിട്ട സ്വദേശികളാണ് കുടുങ്ങിക്കിടന്നിരുന്നത്. ബീഹാറിലെ രാജേന്ദ്ര നഗറിലായിരുന്നു പത്തിലധികം മലയാളി കുടുംബങ്ങള്‍ കുടുങ്ങിയത്. സഹായത്തിനായി നിരന്തരം ബന്ധപ്പെട്ടിരുന്നുവെങ്കിലും വളരെ വൈകിയാണ് ഇവര്‍ക്ക് സഹായമെത്തിയത്. ബിഹാര്‍ സര്‍ക്കാരിന്റെ രക്ഷാപ്രവര്‍ത്തനങ്ങള്‍ കാര്യക്ഷമമല്ലെന്നായിരുന്നു പരാതി. പത്തനംതിട്ട വള്ളിത്തോട് സ്വദേശിയായ സണ്ണിയും ഭാര്യയും രണ്ട് പെണ്‍കുട്ടികളും, ഉള്‍പ്പെടെ പത്തിലധികം പേര്‍ കുടുങ്ങിക്കിടന്നിരുന്നത്. അബ്രഹാം എന്ന മറ്റൊരു മലയാളിയും കുടുംബവും ഇതേ സ്ഥലത്ത് കുടുങ്ങിയിരുന്നു. വീടിന്റെ ഒരു നില പൂര്‍ണമായും മുങ്ങിയ നിലയില്‍ നിന്നാണ് ഇവരെ രക്ഷപ്പെടുത്തി സുരക്ഷിത സ്ഥാനത്തെത്തിച്ചത്. തങ്ങളിപ്പോള്‍ സുരക്ഷിതരാണെന്നാണ് ഇവര്‍ ബന്ധുക്കളെ അറിയിച്ചത്.