തൃശൂര്‍: രണ്ടാം ജനകീയാസൂത്രണ ക്യാംപയിനിന്റെ ഭാഗമായി കിലയില്‍ സംഘടിപ്പിച്ച രണ്ടാമത്തെ ഏകദിന ശില്‍പ്പശാല മുന്‍ഗണനാവിഷയങ്ങളെക്കുറിച്ച് ചര്‍ച്ച ചെയ്തു. ആദ്യശില്‍പ്പശാലയില്‍  ഗ്രാമ-ബ്ലോക്ക്-ജില്ലാ പഞ്ചായത്ത്-മുനിസിപ്പല്‍- കോര്‍പ്പറേഷന്‍ പ്രതിനിധികളാണ് പങ്കെടുത്തതെങ്കില്‍, തദ്ദേശഭരണവുമായി ബന്ധപ്പെട്ട വിവിധ വിഷയങ്ങളിലെ വിദഗ്ദ്ധര്‍, വിവിധ വകുപ്പുകളില്‍നിന്നുള്ള ഉദ്യോഗസ്ഥര്‍, സന്നദ്ധസംഘടനാപ്രതിനിധികള്‍, കില ഫാക്കല്‍റ്റികള്‍ തുടങ്ങിയവരാണ് ഇന്നത്തെ ശില്‍പ്പശാലയില്‍ പങ്കെടുത്തത്. മുന്‍ഗണനാവിഷയങ്ങളെക്കുറിച്ച് കില ഡയറക്ടര്‍ ഡോ.പി.പി ബാലന്‍ ആമുഖാവതരണം നടത്തി.
പ്രകൃതിവിഭവ പരിപാലനം, ജൈവകൃഷി വ്യാപനം, പരമ്പരാഗത വ്യവസായ സംരക്ഷണം, കുടിവെള്ള സംരക്ഷണം, ജലസ്രോതസുകളിലെ മാലിന്യം തടയല്‍, വിദ്യാഭ്യാസ നിലവാരമുയര്‍ത്തല്‍, വികേന്ദ്രീകൃത മാലിന്യ സംസ്‌കരണ പ്ലാന്‍, സാനിറ്റേഷന്‍, മികച്ച ആരോഗ്യപരിപാലനം, ജീവിത ശൈലിരോഗങ്ങള്‍ തടയല്‍, ശിശുസൗഹൃദ തദ്ദേശഭരണം, സമ്പൂര്‍ണ്ണ സാമൂഹ്യസുരക്ഷ, മുതിര്‍ന്ന പൗരന്മാരുടെ ക്ഷേമം, എല്ലാവര്‍ക്കും വീട്, പട്ടികജാതി-പട്ടികവര്‍ഗ വികസനം, ഇതര സംസ്ഥാന തൊഴിലാളികളുടെ പ്രശ്‌നങ്ങള്‍, വിഭവസമാഹരണം, പുതിയ നികുതി, നികുതി പരിഷ്‌ക്കരണം, ബഹുതല ആസൂത്രണം തുടങ്ങിയ മുന്‍ഗണനാ വിഷയങ്ങളാണ് ശില്‍പ്പശാല ചര്‍ച്ച ചെയ്തത്.
വിഷയാവതരണത്തിനുശേഷം ഗ്രൂപ്പുതല ചര്‍ച്ചയും പിന്നീട് ക്രോഡീകരണവുമുണ്ടായി. ശക്തമായ നിരീക്ഷണ സംവിധാനം അനിവാര്യമാണെന്നും അതില്ലെങ്കില്‍ പരാജയമായിരിക്കും ഫലമെന്നു ചൂണ്ടിക്കാണിക്കപ്പെട്ടു. പഞ്ചായത്തടിസ്ഥാനത്തില്‍ വിവരശേഖരണത്തിനു സംവിധാനമുണ്ടാകണമെന്നും നിര്‍ദ്ദേശമുണ്ടായി.