തൊടുപുഴ: സമസ്ത കേരള ഇസ്‌ലാംമത വിദ്യാഭ്യാസ ബോര്‍ഡിന്റെ അഞ്ചാം ക്ലാസ് പൊതുപരീക്ഷയില്‍ തുടര്‍ച്ചയായി 12 ാം തവണയും നൂറുമേനി വിജയം കൈവരിച്ചിരിക്കുകയാണ് പാലമല അന്‍സാറുല്‍ ഇസ്‌ലാം മദ്‌റസ.
ഓരേ അധ്യാപകന് കീഴിലാണ് ഈ നേട്ടം എന്നത് ശ്രദ്ധേയമാണ്. ഏഴ് ഫസ്റ്റ് ക്ലാസും ആറ് സെക്കന്റ് ക്ലാസും രണ്ട് തേര്‍ഡ് ക്ലാസും കരസ്ഥമാക്കി മിന്നുന്ന പ്രകടനമാണ് ഇവിടുത്തെ വിദ്യാര്‍ഥികള്‍ കാഴ്ചവെച്ചത്. കഴിഞ്ഞ 12 വര്‍ഷമായി ഇവിടുത്തെ ഇമാമും സദര്‍ മുഅല്ലിമുമായ കെ.എസ്. ഇസ്മായില്‍ മൗലവി പാലമലയുടെ ശിക്ഷണത്തിലാണ് വിദ്യാര്‍ഥികള്‍ നേട്ടം കൈവരിച്ചത്.
സമസ്ത വിദ്യാര്‍ഥി വിഭാഗമായ എസ്.കെ.എസ്.എസ്.എഫ് ഇടുക്കി ജില്ലാ പ്രസിഡന്റ് കൂടിയാണ് ഇസ്മായില്‍ മൗലവി. പഠന പാഠ്യേതര വിഷയങ്ങളില്‍ അവഗാഹം വര്‍ധിപ്പിക്കുവാനായി നടത്താറുള്ള പ്രായോഗിക പരിശീലനങ്ങളും പഠന യാത്രകളും സാഹിത്യസമാജം പോലുള്ള പ്രവര്‍ത്തനങ്ങളും വിദ്യാര്‍ഥികള്‍ക്ക് മദ്രസാ വിദ്യാഭ്യാസത്തിന്റെ ആവശ്യകതയും പ്രയോജനങ്ങളും മനസിലാക്കാനും കൂടുതല്‍ ആകൃഷ്ടമാക്കാനും പ്രയോജനപ്പെട്ടതായി ഇസ്മായില്‍ മൗലവി പറഞ്ഞു.
ഈ നേട്ടം ജമാഅത്തിന്റെ ആത്മീയ വിദ്യാഭ്യാസ മേഖലയ്ക്ക് കൂടുതല്‍ ഉണര്‍വേകുമെന്നും വിദ്യാര്‍ഥികളേയും അധ്യാപകനേയും പ്രശംസിക്കുന്നുവെന്നും ജമാഅത്ത് പ്രസിഡന്റ് അലിയാര്‍ കളരിപ്പറമ്പില്‍, സെക്രട്ടറി അബ്ബാസ് പഴേരി എന്നിവര്‍ പറഞ്ഞു.

.