ന്യൂഡല്‍ഹി: കേരളാ പൊലിസ് മുന്‍ മേധാവി എഴുതിയ 'നിര്‍ഭയം: ഒരു ഐ.പി.എസ് ഉദ്യോഗസ്ഥന്റെ അനുഭവക്കുറിപ്പുകള്‍' എന്ന പുസ്തകം ഉടന്‍ പിന്‍വലിക്കണമെന്ന് മഹിളാ ഫെഡറേഷന്‍ ദേശീയ സെക്രട്ടറി ആനിരാജ. പുസ്തകത്തിലെ ചില പരാമര്‍ശങ്ങള്‍ സൂര്യനെല്ലി പെണ്‍വാണിഭ കേസിലെ ഇരയായ പെണ്‍കുട്ടിയെ അപകീര്‍ത്തിപ്പെടുത്തുന്നതാണ്.
പുസ്തകത്തില്‍ പെണ്‍കുട്ടി ആരെന്ന് വെളിപ്പെടുത്തുന്നുണ്ട്. ഇത് നിയമവിരുദ്ധമാണ്. സൂര്യനെല്ലി പെണ്‍കുട്ടി തെറ്റുകാരിയാണെന്ന് സ്ഥാപിക്കാനും ഇപ്പോഴത്തെ രാജ്യസഭാ ഉപാധ്യക്ഷനും കോണ്‍ഗ്രസ് നേതാവുമായ പി.ജെ കുര്യന്‍ ഉള്‍പ്പെടെയുള്ളവരെ വെള്ളപൂശാനുമുള്ള ശ്രമങ്ങളും പുസ്തകത്തിലുണ്ട്.
അതിനാല്‍ ഈ അധ്യായം പുസ്തകത്തില്‍ നിന്ന് പിന്‍വലിക്കണമെന്നും അവര്‍ ഡല്‍ഹിയില്‍ വാര്‍ത്താസമ്മേളനത്തില്‍ ആവശ്യപ്പെട്ടു.