കണിച്ചാര്‍: കണിച്ചാറില്‍ പുതുതായി നിര്‍മിച്ച ബസ്സ്റ്റാന്‍ഡില്‍ ബസുകള്‍ കയറാതെ പോകുന്നത് യാത്രക്കാര്‍ക്ക് ദുരിതമാകുന്നു. ദീര്‍ഘദൂര കെ.എസ്.ആര്‍.ടി.സി ബസുകളും ചില സ്വകാര്യബസുകളുമാണ് സ്റ്റാന്‍ഡില്‍ കയറാതെ സര്‍വീസ് നടത്തുന്നത്.
ലോകബാങ്ക് സഹായത്തോടെ ഒരുകോടി രൂപ ചിലവഴിച്ചാണ് ബസ്സ്റ്റാന്‍ഡ് നിര്‍മിച്ചത്. ദീര്‍ഘദൂര ബസുകളടക്കം സ്റ്റാന്‍ഡില്‍ കയറാതെ പോകുന്നതോടെ യാത്രക്കാര്‍ വലഞ്ഞു. ബസ്സ്റ്റാന്‍ഡ് പ്രവര്‍ത്തനമായതോടെ ടൗണിലെ ബസ്‌കാത്തിരിപ്പ് കേന്ദ്രത്തില്‍ ബസ് കാത്തു നില്‍ക്കുന്നത് പഞ്ചായത്ത് നിര്‍ത്തലാക്കിയിരുന്നു. ഇവിടെ ബസ്‌കാത്ത് നില്‍ക്കുന്നവര്‍ സ്റ്റാന്‍ഡില്‍നിന്ന് ബസ് കയറണമെന്ന നിര്‍ദേശമാണ് പഞ്ചായത്ത് മുന്നോട്ടുവച്ചത്. ഇതനുസരിച്ച് ബസ്സ്റ്റാന്‍ഡില്‍ ബസ്‌കാത്തുനിന്നവര്‍ക്കാണ് ബുദ്ധിമുട്ട് നേരിടുന്നത്.
കഴിഞ്ഞദിവസം ചെറുപുഴ പോകേണ്ടിയിരുന്ന യാത്രക്കാര്‍ സ്റ്റാന്‍ഡില്‍ ബസ്‌കാത്തു നിന്നെങ്കിലും ബസ്സ്റ്റാന്‍ഡില്‍ കയറാതെ പോയതിനാല്‍ വന്‍തുക ഓട്ടോചാര്‍ജ്ജ് നല്‍കി യാത്രചെയ്യേണ്ട അവസ്ഥയായിരുന്നു. വൈകുന്നേരങ്ങളില്‍ സ്വകാര്യബസുകള്‍ സ്റ്റാന്‍ഡില്‍ കയറാത്തത് മൂലം ട്രെയിന്‍യാത്രക്കാര്‍ക്ക് കൃത്യസമയത്ത് റെയില്‍വേസ്‌റ്റേഷനില്‍ എത്താന്‍ കഴിയാത്ത അവസ്ഥയും നിലവിലുണ്ട്. കെ.എസ്.ആര്‍.ടി.സി ഡിപ്പോയില്‍ പരാതിനല്‍കിയെങ്കിലും യാതൊരു നടപടിയും ഉണ്ടായിട്ടില്ലെന്നും നാട്ടുകാര്‍ പറയുന്നു. സ്റ്റാന്‍ഡില്‍കയറാത്ത ബസുകള്‍ക്കെതിരെ നടപടി സ്വീകരിച്ചു യാത്രക്കാരുടെ യാത്രാപ്രശ്‌നം പരിഹരിക്കണമെന്നാണ് യാത്രക്കാരുടെ ആവശ്യം.