ന്യൂഡല്‍ഹി: ഔദ്യോഗിക സര്‍ക്കാര്‍ പരിപാടികളില്‍ വന്ദേമാതരം ആദ്യം ആലപിക്കണമെന്ന് കേന്ദ്ര ആഭ്യന്തര മന്ത്രാലയം ഉത്തരവിറക്കി. വന്ദേമാതരവും, ദേശീയഗാനമായ ജനഗണമനയും ആലപിക്കുമ്പോള്‍ പാലിക്കേണ്ട മാര്‍ഗനിര്‍ദേശങ്ങള്‍ ഔദ്യോഗിക വെബ്‌സൈറ്റില്‍ ലഭ്യമാണെന്നും സര്‍ക്കാര്‍ അറിയിച്ചു. ആലാപനത്തിലും, സംഗീതത്തിലും കൃത്യമായ സ്‌ക്രിപ്റ്റും ഉച്ചാരണവും ശൈലിയും പാലിക്കണമെന്നാണ് നിര്‍ദേശം. 

പ്രസിഡന്റിന്റെ ഔദ്യോഗിക സന്ദര്‍ശനവേളകള്‍, ഗവര്‍ണര്‍മാരുടെ പരിപാടികള്‍, ഔദ്യോഗിക പരേഡുകള്‍ എന്നിവയില്‍ വന്ദേമാതരം ആലപിക്കണം. ഈ സമയം സദസ് നിര്‍ബന്ധമായും എഴുന്നേറ്റ് നിന്ന് ശ്രദ്ധയോടെ ആദരവ് പ്രകടിപ്പിക്കണമെന്നാണ് നിര്‍ദേശം. ഔദ്യോഗിക ചടങ്ങുകളില്‍ വന്ദേമാതരത്തിന്റെ ആറ് ചരണങ്ങള്‍, കൃത്യം മൂന്ന് മിനുട്ട് പത്ത് സെക്കന്‍ഡ് ദൈര്‍ഘ്യത്തില്‍ ആലപിക്കണം. ദേശീയഗാനവും, ദേശീയഗീതവും ഒരുമിച്ച് വരുന്ന സന്ദര്‍ഭങ്ങളില്‍ വന്ദേമാതരം ആദ്യം ആലപിക്കണമെന്നാണ് പുതിയ തീരുമാനം. 

സംസ്ഥാന ഗാനങ്ങള്‍ പാടുകയാണെങ്കില്‍ അത് ദേശീയ ഗീതങ്ങള്‍ക്ക് ശേഷം മാത്രമേ പാടാവൂ എന്നും, ദേശീയ ഗാനത്തിന്റെ പദങ്ങളിലും സംഗീതത്തിലും ഭരണകൂടം അനുവദിക്കുന്ന മാറ്റങ്ങള്‍ ഒഴികെ മറ്റൊന്നും വരുത്താന്‍ പാടില്ലെന്നും ഉത്തരവില്‍ വ്യക്തമാക്കുന്നു. 

അതേസമയം കേന്ദ്ര സര്‍ക്കാര്‍ നടപടിക്കെതിരെ വിവിധ കോണുകളില്‍ നിന്ന് പ്രതിഷേധവും ശക്തമാണ്. സംസ്ഥാന ഗാനങ്ങളെ ദേശീയഗീതത്തിനും, ഗാനത്തിനും ശേഷം മാത്രം പരിഗണിക്കുന്നത് ഫെഡറല്‍ തത്വങ്ങളെ ദുര്‍ബലപ്പെടുത്താനും കേന്ദ്രീകൃത ദേശീയതയ്ക്ക് മേല്‍ക്കൈ നല്‍കാനും ലക്ഷ്യമിട്ടുള്ളതാണെന്ന് വിമര്‍ശനമുണ്ട്. ജനഗണന മതേതരത്വത്തിന്റെയും, ബഹുസ്വരതയുടെയും പ്രതീകമായി നില്‍കുമ്പോള്‍, വന്ദേമാതരത്തിന് പ്രാധാന്യം നല്‍കുന്നത് ബിജെപിയുടെ രാഷ്ട്രീയ അജണ്ടയുടെ ഭാഗമാണെന്നും രാഷ്ട്രീയ നിരീക്ഷകര്‍ ചൂണ്ടിക്കാട്ടുന്നു.