തളിപ്പറമ്പ് : തളിപ്പറമ്പ് ടാഗോര്‍ വിദ്യാനികേതനില്‍ കന്നുകാലിശല്ല്യം രൂക്ഷമായതായി പരാതി. കുട്ടികളുടെ സുരക്ഷയെത്തന്നെ ബാധിക്കുന്ന രീതിയിലാണ് കന്നുകാലികള്‍ സ്‌കൂള്‍ വളപ്പില്‍ സൈ്വര്യ വിഹാരം നടത്തുന്നത്.
ഇടക്കാലത്ത് അലഞ്ഞു തിരിയുന്ന കന്നുകാലികളെ പിടിച്ചു കെട്ടാന്‍ നഗരസഭ ഇടപെട്ട് കര്‍ശന നടപടി സ്വീകരിച്ചതിനാല്‍ ശല്ല്യം കുറഞ്ഞിരുന്നെങ്കിലും അധികാരികള്‍ ആ ഉദ്യമത്തില്‍ നിന്നും പിന്‍മാറിയതോടെ ഇവയുടെ ശല്ല്യം വീണ്ടും വര്‍ദ്ധിച്ചിരിക്കുകയാണ്.
സ്‌കൂള്‍ വളപ്പിനു ചുറ്റും മതിലും ഗെയിറ്റുമൊക്കെയുണ്ടെങ്കിലും സാമൂഹ്യ വിരുദ്ധര്‍ മതില്‍ തകര്‍ത്തതാണ് കന്നുകാലികള്‍ കയറി കാര്‍ഷിക വിളകളും ചെടികളും നശിപ്പിക്കുന്നത്.
ഇവ വിദ്യാര്‍ത്ഥികള്‍ക്കു നേരെ അക്രമാസക്തമാകുന്നതും ക്ലാസ്‌റൂമിലുള്‍പ്പെടെ കയറി മലമൂത്ര വിസര്‍ജനം നടത്തുന്നതും പതിവാണ്. വി.എച്ച്.എസ്.സി വിദ്യാര്‍ത്ഥികള്‍ തയ്യാറാക്കിയ പച്ചക്കറി തോട്ടവും പൂന്തോട്ടവുമൊക്കെ കന്നുകാലി ശല്ല്യം കാരണം മൂടിവെക്കേണ്ട അവസ്ഥയാണുളളതെന്നും അധ്യാപകര്‍ പറയുന്നു.
കൃഷി പ്രധാന വിഷയമായെടുത്തു പഠനം നടത്തുന്ന വി.എച്ച്.എസ്.സി വിദ്യാര്‍ത്ഥികള്‍ പഠനത്തിന്റെ ഭാഗമായി നല്ല രീതിയില്‍ പച്ചക്കറികള്‍ കൃഷി ചെയ്യുന്നുണ്ടെങ്കിലും കന്നുകാലികള്‍ അവ സശിപ്പിക്കുന്നതിനാല്‍ ഏറെ ബുദ്ധിമുട്ടനുഭവപ്പെടുന്നതായും നഗരസഭ ഇടപെട്ട് കന്നുകാലി ശല്ല്യത്തിന് പരിഹാരം ഉണ്ടാക്കണമെന്നുമാണ് സ്‌കൂള്‍ അധികാരികള്‍ ആവശ്യപ്പെടുന്നത്.