മലപ്പുറം: മുഹമ്മദ് നബി(സ്വ) അനുപമ വ്യക്തിത്വം എന്ന പ്രമേയവുമായി സുന്നി യുവജന സംഘം സംസ്ഥാന വ്യാപകമായി ആചരിക്കുന്ന മീലാദ് കാംപയിന്റെ ഭാഗമായി ഇന്ന് മലപ്പുറത്ത് മീലാദ് വിളംബര റാലിയും പൊതു സമ്മേളനവും നടക്കും.
റാലി വൈകീട്ട് നാലിന് കുന്നുമ്മല്‍ എം.എസ്.പി ക്യാംപ് പരിസരത്ത്‌നിന്ന് ആരംഭിക്കും. ജില്ലയിലെ ആമില അംഗങ്ങളും യൂനിറ്റുകളില്‍നിന്നുള്ള ആയിരക്കണക്കിന് ബഹുജനങ്ങളും റാലിയില്‍ അണി നിരക്കും. റാലി കുന്നമ്മല്‍ മുനിസിപ്പല്‍ ബസ് സ്റ്റാന്‍ഡ് വഴി സുന്നി മഹല്‍ പരിസരത്ത് പ്രത്യേകം സജ്ജമാക്കിയ നഗരിയില്‍ സമാപിക്കും.
വൈകീട്ട് അഞ്ചിന് മൗലിദ് പാരായണം ആരംഭിക്കും. കെ.എ റഹ്മാന്‍ ഫൈസി, പുത്തനഴി മൊയ്തീന്‍ ഫൈസി, സയ്യിദ് കെ.കെ.എസ് തങ്ങള്‍ വെട്ടിച്ചിറ, സയ്യിദ് ബി.എസ്.കെ തങ്ങള്‍ നേതൃത്വം നല്‍കും. 5.30ന് പൊതു സമ്മേളനം ആരംഭിക്കും.
എസ്.വൈ.എസ് ജില്ലാ ജനറല്‍ സെക്രട്ടറി അബ്ദുസമദ് പൂക്കോട്ടൂര്‍ ആമുഖ പ്രഭാഷണം നടത്തം. ജില്ലാ പ്രസിഡന്റ് പാണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷനാകും. എസ്.വൈ.എസ് സംസ്ഥാന വൈ. പ്രസിഡന്റ് പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത കേരള ജംഇയ്യത്തുല്‍ ഉലമ ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യ പ്രഭാഷണം നടത്തും. അല്‍ ഹാഫിള് അഹമദ് കബീര്‍ ബാഖവി പ്രമേയ പ്രഭാഷണം നടത്തും. അലവി ദാരിമി കുഴിമണ്ണ ആദര്‍ശ പ്രഭാഷണം നടത്തും. എം.ടി അബൂബക്കര്‍ ദാരിമി സംശയ നിവാരണം നടത്തും.

വാഹന പാര്‍ക്കിങ്

മലപ്പുറം: എസ്.വൈ.എസ് മീലാദ് വിളംബര റാലിക്ക് കൊളത്തൂര്‍, കോട്ടക്കല്‍ ഭാഗത്ത്‌നിന്നുവരുന്ന വാഹനങ്ങള്‍ നൂറാടിപ്പാലം കഴിഞ്ഞ് സിവില്‍ സ്റ്റേഷന്‍ ബൈപാസിലൂടെ തിരിഞ്ഞ് സിവില്‍ സ്റ്റേഷന്‍ വഴി കുന്നുമ്മല്‍ ടൗണില്‍ ആളെ ഇറക്കി തിരൂര്‍ റോഡ്, വലിയ വരമ്പ് ഭാഗങ്ങളില്‍ പാര്‍ക്ക് ചെയ്യുക. പെരിന്തല്‍മണ്ണ ഭാഗത്ത് വരുന്നവര്‍ കലക്ടറുടെ വസതിക്ക് സമീപം ആളെ ഇറക്കി, ജൂബിലി റോഡ്, മുണ്ടുപറമ്പ് വഴി കോഴിക്കോട് റോഡില്‍ വാറങ്കോട് ഭാഗത്ത് പാര്‍ക്ക് ചെയ്യുക. കോഴിക്കോട്, വേങ്ങര ഭാഗത്ത് നിന്ന് വരുന്ന വാഹനങ്ങള്‍ വാറങ്കോട് ബൈപ്പാസിലൂടെ മുണ്ടുപറമ്പ് വഴി മലപ്പുറം കലക്ടറുടെ വസതിക്ക് സമീപം ആളെ ഇറക്കി കിഴക്കെ തല കോഴിക്കോട് റോഡില്‍ പാര്‍ക്ക് ചെയ്യുക.