പാവറട്ടി: കൈതമുക്ക് പൊന്നാംകുളത്തിനു സമീപം പുഴയിലേക്കു വെള്ളം ഒഴുകുന്ന കാനയില്‍ കക്കൂസ് മാലിന്യം തള്ളിയ നിലയില്‍ കണ്ടെത്തി.
സമീപത്തുള്ള പൊന്നാംകുളം നിരവധി പേരുടെ ആശ്രയമാണ്. ഇപ്പോഴിതു മലിനീകരണ ഭീഷണി നേരിടുകയാണ്. ഇപ്പോള്‍ മലിനജലം ഒഴുക്കിയ കാനയിലൂടെയാണ് കൂരിക്കാട് ഉള്‍പ്പെടെയുള്ള മേഖലയിലേക്ക് ശുദ്ധജല പൈപ്പ് ലൈനുകള്‍ സ്ഥാപിച്ചിട്ടുള്ളത്.
ബന്ധപ്പെട്ട അധികാരികളും ഭരണകര്‍ത്താക്കളും ഈ വിഷയത്തില്‍ കര്‍ശന നടപടി സ്വീകരിക്കണമെന്ന് പൈങ്കണ്ണിയൂര്‍ പി.എസ്.സി സംസ്‌കാരിക വേദി പ്രവര്‍ത്തകര്‍ ആവശ്യപ്പെട്ടു.
ഹെല്‍ത്ത് ഇന്‍സ്‌പെക്ടര്‍ പ്രിയദര്‍ശന്‍, ക്ലബ് ഭാരവാഹികളായ ഫഹദ് മുസ്‌ലിം വീട്ടില്‍, സൈഫുദ്ദീന്‍ മണക്കോട്ട്, സലാഹുദ്ദീന്‍ പൈങ്കണ്ണിയൂര്‍, വി.പി അബ്ദുമോന്‍, എം.പി മുഹ്‌യുദ്ദീന്‍ ശുചീകരണ പ്രവര്‍ത്തനത്തിന് നേതൃത്വം നല്‍കി.