കൊച്ചി: നെയ്യാറ്റിന്‍കരയില്‍ തര്‍ക്കത്തിനിടെ യുവാവിനെ റോഡിലേക്ക് തള്ളുകയും വാഹനാപകടത്തില്‍പ്പെട്ട് മരിക്കുകയും ചെയ്ത കേസ് ക്രൈംബ്രാഞ്ച് അന്വേഷിക്കും. അന്വേഷണം ക്രൈംബ്രാഞ്ചിന് കൈമാറിയതായി ഡി.ജി.പി അറിയിച്ചു. ഡിവൈ.എസ്.പി ബി.ഹരികുമാറിനെതിരേയാണ് ക്രൈംബ്രാഞ്ച് അന്വേഷണം. ഹരികുമാറിന്റെ പാസ്‌പോര്‍ട്ട് കണ്ടുകെട്ടാന്‍ നിര്‍ദേശം നല്‍കിയിട്ടുണ്ട്. വൈകാതെ ലുക്കൗട്ട് നോട്ടീസ് ഉടന്‍ പുറത്തിറക്കും. സംഭവത്തെ തുടര്‍ന്ന് ഹരികുമാറിനെ സസ്‌പെന്‍ഡ് ചെയ്തിട്ടുണ്ട്.

കൊടങ്ങാവിളയിലെ വനിതാ സുഹൃത്തിന്റെ വീട്ടില്‍ എത്തിയതായിരുന്നു ഡിവൈ.എസ്.പി ബി. ഹരികുമാര്‍. വീട്ടില്‍ നിന്ന് ഇറങ്ങി കാര്‍ എടുക്കാന്‍ എത്തിയപ്പോഴാണ് സനലിന്റെ വാഹനം സമീപത്ത് നിര്‍ത്തിയിട്ടത് കണ്ടത്. കാര്‍ മാറ്റി തരാന്‍ ഡിവൈ.എസ്.പി സനലിനോട് ആവശ്യപ്പട്ടു. സിവില്‍ ഡ്രസ്സിലായിരുന്ന ഡിവൈ.എസ്.പിയെ സനലിന് തിരിച്ചറിയാനായില്ല. തുടര്‍ന്ന് ഇരുവരും തമ്മില്‍ വാക്കുതര്‍ക്കമുണ്ടാവുകയും ഹരികുമാര്‍ സനലിനെ തള്ളിയിടുകയുമായിരുന്നുവെന്ന് ദൃക്‌സാക്ഷികള്‍ പറയുന്നു.