മഞ്ചേരി: മഞ്ചേരിയില്‍ ആര്‍.എസ്.എസ് പ്രവര്‍ത്തകര്‍ വീട്ടില്‍ കയറി അക്രമം അഴിച്ചുവിട്ടു. സി.പി.എം പ്രവര്‍ത്തകനായ എളങ്കൂര്‍ മൈലൂത്ത് അഭിലാഷിന്റെ വീട്ടില്‍ അതിക്രമിച്ച് കയറിയാണ് ആര്‍.എസ്.എസ് പ്രവര്‍ത്തകര്‍ അക്രമം നടത്തിയത്. ഇന്നലെ ഉച്ചക്ക് രണ്ടിനാണ് സംഭവം. അയ്യപ്പ ഭക്തരെ പരിഹസിച്ച് കൊണ്ട് അഭിലാഷ് ഫെയ്‌സ്ബുക്കില്‍ അപകീര്‍ത്തിപരമായ പരാമര്‍ശം പോസ്റ്റ് ചെയ്തതാണ് ആര്‍.എസ്.എസ് പ്രവര്‍ത്തകരെ പ്രകോപിപ്പിച്ചത്. ഇതോടെ സംഘം ചേര്‍ന്നെത്തിയ ആര്‍.എസ്.എസ് പ്രവര്‍ത്തകര്‍ സി.പി.എം പ്രവര്‍ത്തകനായ അഭിലാഷിന്റെ വീട്ടില്‍ കയറി വീട്ടുകാരെ മര്‍ദിക്കുകയായിരുന്നു.
ഏതാനും ദിവസങ്ങള്‍ക്ക് മുന്‍പ് എളങ്കൂര്‍ കരിക്കാട് ഭാഗത്ത് സി.പി.എം ഓഫിസും, ബോര്‍ഡുകളും അജ്ഞാത അക്രമി സംഘം നശിപ്പിച്ചിരുന്നു.
ഈ സംഭവത്തില്‍ പൊലിസ് ആരെയും ഇതുവരെ അറസ്റ്റു ചെയ്തിട്ടില്ല. ഇതിന് പിന്നാലെയാണ് പ്രദേശത്തെ സമാധാനം തകര്‍ക്കാന്‍ ആര്‍.എസ്.എസും സി.പി.എമ്മും ശ്രമിക്കുന്നതെന്ന് നാട്ടുകാര്‍ പറഞ്ഞു.
സംഭവത്തില്‍ കേസെടുത്ത് അന്വേഷണം ആരംഭിച്ചതായി മഞ്ചേരി സി.ഐ എന്‍.ബി ഷൈജു പറഞ്ഞു.