കരുവാരകുണ്ട്: കാറില്‍ കടത്തുകയായിരുന്ന ആറു കിലോഗ്രാം കഞ്ചാവുമായി രണ്ടുപേര്‍ കരുവാരകുണ്ട് പൊലിസിന്റെ പിടിയിലായി. മഞ്ചേരി കരുവമ്പ്രം സ്വദേശി അരിമ്പ്രതൊടി അന്‍വര്‍ (30), പെരിന്തല്‍മണ്ണ രാമപുരം സ്വദേശി മുളയന്‍ തൊടി മിക്ദാദ് അലി (42) എന്നിവരെയാണ് കരുവാരകുണ്ട് എസ്.ഐ പി.ജ്യോതീന്ദ്രകുമാറും സംഘവും അറസ്റ്റു ചെയ്തത്.
പൊലിസിനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ മാമ്പുഴ ഐലാശ്ശേരി റൂട്ടിലെ താണിക്കുത്ത് ചേട്ടന്‍ പടിയില്‍വച്ചാണ് കാറില്‍ കഞ്ചാവുകടത്തുകയായിരുന്ന ഇരുവര്‍ സംഘം പിടിയിലായത്. തുവ്വൂര്‍, കരുവാരകുണ്ട്, ചോക്കാട്, കാളികാവ് തുടങ്ങിയ മലയോര മേഖലയിലെ ചില്ലറ വില്‍പനക്കാര്‍ക്ക് വിതരണം ചെയ്യാനുള്ളതായിരുന്നു പിടിച്ചെടുത്ത കഞ്ചാവ്. കഞ്ചാവ് കടത്താന്‍ ഉപയോഗിച്ച മാരുതി ആള്‍ട്ടോ 800 കാറും പൊലിസ് കസ്റ്റഡിയിലെടുത്തിട്ടുണ്ട്. തമിഴ്‌നാട്ടില്‍ നിന്നാണ് ഇവര്‍ കഞ്ചാവ് എത്തിക്കുന്നത്. പിടിയിലായ പ്രതികള്‍ക്ക് പിന്നില്‍ പ്രവര്‍ത്തിക്കുന്ന മാഫിയയെ കുറിച്ച് അന്വേഷണം ഊര്‍ജിതമാക്കിയതായി പൊലിസ് പറഞ്ഞു. പ്രതികളെ നാളെ മഞ്ചേരി കോടതിയില്‍ ഹാജരാക്കും.