ചെറുവത്തൂര്‍: എന്‍.ഡി.എ സംഘടിപ്പിച്ച ശബരിമല സംരക്ഷണയാത്രയ്ക്കിടെ സംഘര്‍ഷാവസ്ഥ. വാഹനത്തിനു നേരെ കല്ലേറുമുണ്ടായി. കണ്ണൂര്‍-കാസര്‍കോട് ജില്ലാതിര്‍ത്തിയായ കാലിക്കടവില്‍ ഇന്നലെ വൈകീട്ട് 6.30 ഓടെയായിരുന്നു സംഭവം. കാസര്‍കോട്ടുനിന്നു പ്രയാണം ആരംഭിച്ച യാത്രയെ വരവേല്‍ക്കാന്‍ കണ്ണൂര്‍ ജില്ലയില്‍ നിന്നുള്ള നൂറോളം പ്രവര്‍ത്തകര്‍ അഞ്ചുമണിയോടെ തന്നെ കാലിക്കടവില്‍ എത്തിയിരുന്നു. എന്നാല്‍ ഇവര്‍ ദേശീയപാതയില്‍ ഗതാഗത തടസം ഉണ്ടാക്കുന്നുവെന്ന പരാതിയുമായി ഒരു സംഘമാളുകള്‍ പ്രതിഷേധമുയര്‍ത്തി.
പൊലിസ് ഇടപെട്ട് സ്ഥിതിഗതികള്‍ ശാന്തമാക്കി. ഇതിനിടയിലാണ് രഥയാത്ര കടന്നുവന്നത്. ഇതോടെ കൂടിനിന്ന ആളുകള്‍ക്കിടയില്‍നിന്നു സര്‍ക്കാറിനെ അനുകൂലിച്ചു മുദ്രാവാക്യം വിളികള്‍ ഉയര്‍ന്നു. വീണ്ടും സംഘര്‍ഷാവസ്ഥയിലേക്കു കാര്യങ്ങള്‍ എത്താതെ നോക്കാന്‍ പൊലിസ് ശ്രമിക്കുന്നതിനിടെയാണ് ശ്രീധരന്‍ പിള്ള സഞ്ചരിച്ച കാറിനു നേരെ കല്ലേറുണ്ടായത്. എന്നാല്‍ കാറിനു കേടുപാടുകള്‍ സംഭവിച്ചില്ല. യാത്ര നിര്‍ത്തിവച്ചു ദേശീയപാതയില്‍ കുത്തിയിരിക്കാനുള്ള തീരുമാനവുമായി ബി.ജെ.പി നേതാക്കള്‍ രംഗത്തു വന്നെങ്കിലും പൊലിസ് അനുവദിച്ചില്ല. തുടര്‍ന്ന് യാത്ര കണ്ണൂര്‍ ജില്ലയില്‍ പ്രവേശിച്ചു.