കൂത്തുപറമ്പ്: ട്യൂഷന്‍ ക്ലാസിലേക്ക് പോവുകയായിരുന്ന വിദ്യാര്‍ഥിനിയെ ശാരീരികമായി ഉപദ്രവിച്ച സംഭവത്തില്‍ യുവാവിനെ പൊലിസ് അറസ്റ്റു ചെയ്തു. കൂത്തുപറമ്പിലെ ട്യൂഷന്‍ സെന്ററിലേക്ക് പോകുമ്പോള്‍ പതിനാറു വയസുകാരിയായ വിദ്യാര്‍ഥിനിയെ ഉപദ്രവിച്ചെന്ന കേസിലാണ് ശിവപുരം മെട്ടയിലെ വള്ളില്‍ വീട്ടില്‍ റഹീമിനെ(36) കൂത്തുപറമ്പ് എസ്.ഐ കെ.വി നിഷിത്ത് അറസ്റ്റ് ചെയ്തത്.
കഴിഞ്ഞ മാസം 25നാണ് കേസിനാസ്പദമായ സംഭവം. രാവിലെ 7.15ന് ട്യൂഷന്‍ സെന്ററിന്റെ ഗോവണി കയറവെ എതിരേ വന്ന യുവാവ് പെണ്‍കുട്ടിയെ ശാരീരികമായി ഉപദ്രവിക്കുകയായിരുന്നു. തുടര്‍ന്ന് ഇയാള്‍ ഓടിരക്ഷപ്പെടുകയും ചെയ്തു. പൊലിസില്‍ പരാതി നല്‍കിയതിനെ തുടര്‍ന്ന് സമീപത്തെ കടയിലെ സി.സി.ടി.വി കാമറാദൃശ്യങ്ങള്‍ പരിശോധിച്ചപ്പോഴാണു പ്രതിയെക്കുറിച്ച് സൂചന ലഭിച്ചത്.തുടര്‍ന്ന് ചക്കരക്കല്ലിലെ ഹോട്ടലില്‍ തൊഴിലാളിയായി ജോലി ചെയ്തുവരികയായിരുന്ന റഹീമിനെ പൊലിസ് സംഘം കസ്റ്റഡിയിലെടുക്കുകയായിരുന്നു. പോക്‌സോ വകുപ്പുപ്രകാരമാണ് പൊലിസ് കേസെടുത്തത്. പ്രതിയെ കൂത്തുപറമ്പ് ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി റിമാന്‍ഡ് ചെയ്തു.